V.V. de Rogstaekers – Wieërt

Nao 23 jaor as artiest aktief bieëzig te zeen gewaesj inne Rogstaekers Boonte Aovendje hieët Ton Adriaens zie waemeske definitief aanne kapstok gehânge. Nao aafloup van 10 zieër geslaagdje vuuërstéllinge in ’t Munttheater gînge de gerdiêne op zaoterdigaovendj 21 januari  2012 vör Ton as artiest vör ’t lést tow. Vuuërdet det gebuuërdje woeërt Ton vör zien lang loupbaan as artiest doeër Vorst Jan inne schiênwêrpers gezatte en és hae tot Ieëre-artiest beneumdj. De versiersele mét beejpassendje oorkonde woeërte aan hem, same mét zien vraw Marlies, uitgereiktj.
Ton haaj d’rvör gekoeëze um te stoppe as artiest doeër op ‘t podium vuuër zien  geleefdj publiek afscheid te neme en zoeë waas ‘t aftélle tot dae zaoterdag nao de léste vuuërstélling. ‘t Slotnummer vanne Boonte Aovendje weurtj volges traditie afgesloeëte mét e lidje en dit jaor waas de ieër aan Ton om dit uut te veure. Op ‘n vertaling van ‘t lidje “de wereld” van de The Scene woeërt ederein mét de tekst: “Ederein is oppe Mêrrentj en de Mêrrentj és van ederein” opgezwieëptj um mej te zînge en Ton te bedânke. Nao eder vuuërstélling krieëg hae ‘n minutelang staondje ovatie. Ton waas in 1991 en 1992 (as gevolg vanne Golfoeërlog) twieë jaor Preens vanne Rogstaekers en haaj as orde ‘Slumke z’n vesje’. Ton hieët zich in zien carrière ontwikkeldj tot ‘ne rasartiest, dae hieël völ tiepkes oppe plênk kos zétte. De léste jaore kwoom dao de rol van cabaretier beej en noeëm hae de Wieërter politiek en ‘t dageliks laeve oppe korrel en bezörgdje daodoeër  meinigeîn boêkpien van ‘t lache. Vör Ton Adriaens bliêve de gerdiêne tow mer det wilj neet zégke det hae zien stum richting de Boonte Aovendj neet mieër zal laote huuëre.
Ton Adriaens, mét recht ‘ne Ieëre-artiest.