Dânkwoeërd Ieëre Vorst Jan Stroek

20-03-2017

Leêf Rogstaekerinnekes en Rogstaekers,

’t És vörbeej, ’t és gedaon.

Wi-j ich 12 jaore gelieëje Vorst van Stadsvastelaovendjvereiniging de Rogstaekers woôrt veûldje ich vanaaf ’t ieërste momênt de klik tösse de Wieërter vastelaovendjveêrders en mich as Vorst.‘ne Stuuën dae ich al dae tiêd heb moôg ervare, gewéldjig wi-j dejjae achter mich hétj gestânge!
Hóngstraw aan de Rogstaekers en beej eder activiteit, van Boonte Aovendj tot Groeëte Rogstaekersoptocht, woôrdjae d’r beej en kluuërdje gae de vastelaovendj zoeëwi-j hae és: ’n Fieëst vör groeët en klein!
De gooj contacte met oeës Zöstervereiniginge, de optochtdaelnemers en neteûrlik de kepélle. De feîn samewêrking met Stiepels en vreejwilligers en uuteraard de lede en aod-lede van Stadsvastelaovendjvereiniging de Rogstaekers.
Ál di-j minse, ál di-j vastelaovendjgekke wil ich vanuut de groond van mien hért bedânke vör ‘ne fantastische tiêd!
Mer speciaal wil ich mien vraw Jenny en mien hoêshaoje bedânke vör de onvuuërwaerdelikke stuuën en mejwêrking det ich dit 12 jaor lânk heb moôge en kúnne doon.

Nao ’n gewéldjig aafscheidsfieëst op vastelaovendjdieënsdig waat, mede doeër alle hértverwêrmendje en persuuënlike reacties, ‘ne onvergaetelikke daag és gewoeëre ésj noow gedaon.
Zeêtj gerösj: Ich gaon neet op wîntjersport. Ich zâl vastelaovendj bliêve veere zoeëlang ich kân, want de vastelaovendj stieët mich in m’n hért gegravieërdj.
De vastelaovendj mót en zâl ’n groeët vôlksfieëst bliêve woeëbeej ich hoeëp det miene opvolger Stan op daezellufdje stuuën van ‘t Wieërter vastelaovendjpubliek moôg raekene as ich heb gatj.

Ich wîns uch allemaol: “Völ plezeer op ’n schoeën meneer!”

Met vrîntelikke groet,

Ieëre Vorst Jan Stroek