V.V. de Rogstaekers – Wieërt

Installâsie en Resepsie 2012

De Installaasie en de Resepsie van oeës Rogstaekerspreense es unne hieële speciaale en drökke daag vör de hoeëghede.

De Installaasie en Resepsie vingtj plaats op de leste zondig vuur de Vastelaovundj. Tiedus de Instalaasie op ’t stadhoês ontvange  de Rogstaekers Preense de sluuëtels van de Stât Wieërt uut hâng van Opper Opper Rogstaeker Börgemeister Heijmans.

Tiedus de Installaasie verzörigtj ’t kolleezje van B&W van Wieërt un ludieke akt.

Dit wuuërdj eeder jaor doeër ein van de wethaojers bedachtj. Heej met waere oeës Preense op un ludieke meneer oppe hak genaome vuur ze geinstalieërdj waere.

Oeës Preense belichte op hun buurt met völ lol en flauwekul  de Wieerter politiek.

Um 15:00 oor startj de Preense Resepsie. Dit es vör de Hoeëgheden un onvergaetelikke gebuuertenis. De resepsie stieet vollop in ’t teiken van Vastelaovundj en eederein jonk en aod, Vastelaovundj vereinigingen en Vastelaovundjleefhebbers zeen van herte welkom.

Neet allein um det eederein verkledj es mer auch umdet diverse kepelle groeët en klein op un podium muziek kunne maake.

Naeve al dit muzikaal geweldj spuuële de Blue Commets de hieëlle resepsie alleein mer Wieërter vastelaovundj muziek en es d’r vermaak vör de wichter. Met ânger wuuerd, ’t es ein en al fieest in ’t Rogstaekerspaviljoen.