Rogstaekerspreens

Stadspreens 2018: Preens Phil I van de Rogstaekers

Op zaoterdig 13 jannewari 2018 woôrt, vör ‘t ieërst doeër Vorst Stan van Stadsvastelaovendjvereiniging de Rogstaekers, Phil Aspers uutgeroôpe tot Stadspreens Phil I.

De muzikale Rogstaekerspreens és zieëker geine onbekindje in ‘t Wieërter uutgaonscircuit. As DJ drejdje hae al in meînig keffee en op völ fieëstjes. Hae és prizzentator van ‘t gezélligste festival van ’t lând: Bospop en stóng oppe plânke vanne Boonte Aovendje van V.V. de Brökwagters. Daonaeve és hae optochtdaelnemer met V.V. Hallûf Aaf, mer völ vastelaovendjveerders zölle ‘m vuuërâl kinne as zênger van ‘t populaire ‘Moerepetazie’.

De 31-jaorige Hoeëgheid és ‘ne zoeën van Frans Aspers en Ine Martens en grujdje op inne Wieërter wiêk Bosseve. Vader Frans woor beej meînig Wieërtenaar bekindj as vuuërmaolig spits van Wilhelmina ’08 en FC Oda, woeë ouch Phil zelluf regelmaotig tieëge ‘ne bâl hieët gestâmptj. Mooder Ine grujdje op inne stad, in ’t bedriêf van heûr aojers, Garage Bloemen aane Remundjsewieëg.

 

Tiêdes ‘n Moulin Blues-festival in d’Oospel lieërdje Preens Phil I zien vrîndin Nicole van Bogget kinne. Nicole és ‘n geboeëre en getoeëge Ni-jwieërse en ‘n dochter van Thieu van Bogget en Cathy Vossen. ‘t Stêl woeëntj same oppe Stellingmolen 37 op Muuëlenakker.

 

Ofschoeën opgelédj tot gymlieëraar wêrktj Phil I oppe meziekaafdeling van BCM Music Systems op Kampershoek woeë m’n meziekcomputers en software bawtj vör de horeca en retail.

 

2018.foto.01 Preens
2018.foto.03 Preens

Meziek en vastelaovendj loûpe wi-j ‘ne roeëje draod doeër ‘t laeve vanne 74e Stadspreens. As óngerscheiding hieët hae dan ouch ingestéldj:

deOrde van ’t vastelaovendjlidje”.

Preens Phil I zâl de Wieërter vastelaovendj vuuër gaon ónger zien devies:

AS DE MEZIEK BEGINTJ TE SPUUËLE EN DE GLAZE KLÎNKE,
GAON VAE D’R SAME EINE DRÎNKE!

 

 

(Foto's: Loes Mennen Fotografie)

Proclamatie

Vae Preens Phil I

  • Beej de gratie van Vorst Stan, de Raod van Elf en de Rogstaekersvereiniging, Hieërser oeëver Wieërt van 13 jannewari wis 13 fibberwari.
  • Zoeën van aod spits van FC ODA en Wilhelmina Frans Aspers en Ine Martens van vuuërhaer garage Bloemen op de Remundsjewieëg.
  • Geboeëre inne stad en getoeëge op Bosseve in ’t riêk vanne Brökwagters.
  • Gestudieërdj aan ‘t CIOS in Zitterd.
  • Groeëts meziekleêfhebber, zoeëwaal toês as op oeës wêrk en diskjockey vör al eur fieëstjes.
  • Optochtlouper van V.V. Hallûf Aaf  en Aod Boonte Aovendj-spuuëler op Bosseve
  • Aod voetballer van FC ODA.
  • Prizzentator van ‘t schoeënste festival van hieël ‘t lând, Bospop.
  • Hértstikke gek op mien maegdje Nicole.
  • Instéller vanne ‘Orde van ’t Vastelaovendjlidje’,

Doon te wiête dét:

  1. Vae os vör de volle 100 decibel gaon gaeve as vae de sluuëtel kriêge van Opper-Opper- Rogstaeker Jos Heijmans
  2. De meziek ein van de belângriêkste dînger inne vastelaovendj és. Dus paktj uch beejein en zingtj met di-j daag alle lidjes mej
  3. Vae uch allemaol gaer tieëge kaome met di-j daag, dan kunne vae d’r “Same eine drînke”
  4. Vae as aojer det vastelaovendjgeveûl doeër mótte gaeve aane jonger ginnerâsies
  5. Vae met Boorebâl neet allein van Moerepetazie mer ouch van Booremoôs haoje
  6. Vae hoeëpe dejjae met zoeë völ muuëgelik mân nao de Groeëte Optocht en de Wichteroptocht kótj kiêke, waer of gein waer
  7. Gae neet wi-j ‘ne loeëte mótj bliêve staon, gae mótj “Dânse (met Vastelaovendj)”
  8. Vae met oeës gezélschap gruuëts zeen um uch vuuër te moôge gaon, mer beloeëftj os ein dînk: “Doôtj met os mej!”
  9. Vae mette vastelaovendj “Komplieët van Slaag” zölle zeen
  10. Vae d’r zoeë haard tieëge’n’aan gaon met di-j daag det de ze vanaaf de stâsie tot de Statterbrök ‘t straotwêrk vör de 11e kieër kunne reparieëre
  11. Dejjae met gooj zin op paad mótj gaon en vastelaovendj veêrtj op eur eige meneêr en dét alles ónger oeës devies:

 

As de meziek begintj te spuuële
en de glaze klînke,

 

gaon vae d’r same eine drînke!

Gegaeve te Wieërt, jannewari 2018

2018.foto.02 Preens

Lidje van Preens Phil I tiêdes uutroping in Munttheater, 13-01-2018
Tiêdes zien uutrooping tot Preens Phil I aan 't îndj vanne Gala Boonte Aovendj zong hae zien eige Vastelaovendjlidje.
'n Registratie van Special Events Productions (s-e-p).


Gae kintj d'r neteurlik ouch 's good vör gaon zitte en de hieële uutroping nog 's mejmake!
Royaal 40 minute schoeën bieëldje van onvergaetelikke momênte, vastgelagdj door Special Events Productions (s-e-p)