Rogstaekerspreens

Stadspreens 2017: Preens Maurice I van de Rogstaekers

Op zaoterdig 14 jannewari 2017 és, aansloêtendj aan de Gala Boonte Aovendj in ‘t Munttheater, Maurice Houben uutgeroôpe tot 73e Stadspreens van Wieërt.

De 44-jaorige Preens Maurice I és geboeëre en getoeëge oppe Regentesselaan op Kieëntj as zoeën van Bert Houben en Toos Schreurs. Hae és ‘ne kleinzoeën van Teng Houben van de Gebreûrs Houben van ónger ângere Keffee de Waag. Vör de wat mieër belaege laezer, det keffee loôg vreûger as dejjae vanne stad uut de stâsietunnel doeër gingtj en d’r dan recht tieëge’n’aan. Hae és ‘ne achterkleinzoeën van Stroeëj Doeërus Houben.
Hae woeëntj same met Wendy Vleeshouwers, ’n dochter van Bert Vleeshouwers en Toos Aspers van Bosseve, aan de Kêrkstraot 167 in Wieërt, in ’t aod hoês van meister Huub van den Bosch, zaliger.

(Foto's: Loes Mennen Fotografie)

De nowwe Hoeëgheid wêrkdje as postboeëj en woor ruuëm 12 jaor eigenaar van ‘House of Billiards’ in de Smieëtspassage. Sins 2 jannewari jl. és hae wêrkzaam beej de Sligro in Wieërt woeë hae verântwoeërdelik és vör de wiên- en gedistillieërdjaafdaeling.
Op sommige daag és Preens Maurice I geine onverdeênstelik poolbiljaarder, zoeë woôr hae aafgeloûpe jaor Nederlands kampioen beej de 40-plussers. Daonaeve és uutaete ‘ne groeëte hobby, van friettênt tot sterrerestaurânt; Maurice geneêtj d’rvan.

Minse plaoge, soms op of zjuust oeëver ‘t réndje, Preens Maurice vingtj ‘t prachtig. Hae és dus ‘ne échte ‘Jênser’.
Met V.V. de Jênsers deût Maurice al 25 jaor mej aan de Groeëte Rogstaekersoptocht. En neet onverdeênstelik want zeûj wonne al 2 kieër de Knouwelpriês en woôrte al ‘s 4een 3e inne optocht. In 2015 woôrt waal de Knouwelpriês binnegehaaldj, mer pakdje ze met heûr “Kiloknallers” zjuust naeve de Gouwe Rog en woôrte 2e inne optocht.
As échte ‘Jênser’ hieët Rogstaekerspreens Maurice I deorde van de Jênser ingestéldj. Z’n devies vör de kaomendje waeke:

Maaktj lôl , plezeer en lachtj minse, mieër kân ich mich as Preens neet wînse

Foto Loes Mennen Fotografie

Proclamatie

  • Vae Preens Maurice I , beej de grâsie van Vorst Jan en Vorst in spé Stan, de Raod van Elluf en de Rogstaekersvereiniging.
  • Hieërser oeëver Wieërt van 18 fibberwari wis 28 fibberwari,
  • Ambassedeur van Kieëntj, geboeëre Vêrkuskop, en vuuërmaolig goalgetter en jubilaris van MMC Wieërt.
  • Mede-oprichter, besteurslid, kértrekker, vêrfmeister, (onuutveûrbaar) ideeë- verzinner, knouwelpriêswinnaar, en optochtmotto-expert van V.V. De Jênsers Wieërt 1991,
  • Biljaarzaalhaojer in ruste, Nederlands Kampioen poolbiljaare beej de 40 plussers, uutmuntendj topfigurânt beej de Rogstaekerslegende en in ’t schnabbelcircuit baeter bekindj as De Groeëte Houbini!
  • Hoeëfd broeëd-oppe-plânk-brînger in de Houben-Vleeshouwers residênsie, gelaege oppe Kêrkstraot 167 te Wieërt.
  • Dit vuuërmaolig lândgood van meister Huub van den Bosch zaliger és good te herkinne aane lang opri-jlaan beginnendje aane Duitse bocht!
  • Wiênkinner, wiêndrînker, en wiênverkoûper van Chateau Migraine tot aan Chateau Briand.
  • En groeët leefhebber van uut aete of beej ‘ne mins toês, gae beltj, ich schuuf aan.
  • Mér boeëve’n’âl vastelaovendjveerder in hért en neere, etc. etc.

Instéller van de  “Orde van de Jênser”

Doon uch te wiête det:

  1. Vae d’r van uutgaon dejjae uch as boor laotj bekiêke tiêdes ’t Boorebâl, al mót dit vör völ minse gein probleem zeen!
  2. Vae d’r van uutgaon det vröllie zich op heur schoeënst schminke,  zoeëdet ’n dör bleûmke toch nog ’n schoeën bloom wûrtj!
  3. Vae d’r van uutgaon dejjae eûr wichter Wieërs lieërtj kalle, um te vuuërkaome dejjae d’r eine Preenselik kriêgtj uutgedruuëgtj um eûr oeëre!
  4. Vae d’r van uutgaon det vae hieël Wieërt, dus alle 49.497 inwoeëners verwachte op oeës recepsie!
  5. Vae d’r van uutgaon det jóngk en aod nao de Groeëte Rogstaekersoptocht kûmtj kiêke en tot ’t indj bliêftj staon want dan keûmtj de schoeënste waage!
  6. Vae d’r van uutgaon dejjae op alle aktiviteite presént zeetj,want  vae haoje uch inne gaate, oppe bânk zitte doojjae mér nao di-j daag!
  7. Vae d’r van uutgaon détj ouch inne keffees volle bak és, en te drök ésj noeëts want achterin és altiêd plaats!
  8. Vae d’r van uutgaon dejjae allein mér vôl glaaze beer drînktj en neet ângermans klatse!
  9. Vae d’r van uutgaon det de zon schiêntj met de Groeëte Rogstaekersoptocht, en ’t leefst âl daag, dan mér wat mieër worst nao de zösterkes!
  10. Vae en oeëze kleine collega Jeugdpreens Milan I d’r van uutgaon det de vastelaovendj van 2017 ’ne vastelaovendj és dae ze neet gaw gaon vergaete!
  11. Det vae, Preens Maurice I, hoeëpe dejjae uch met di-j daag lekker laotj gaon en uch behuuërlik uutstöktj want det zâl eûr schaaj neet zeen, ónger oeës devies:

 

Maaktj lôl , plezeer en lachtj minse, mieër kân ich mich as Preens neet wînse

Wieërt, jannewari 2017
Z.D.H. Preens Maurice I

v.l.n.r. Ted en Xandra Seuren, Huub Raemaekers en Samanta Moonen, Preens Maurice en Wendy Vleeshouwers, Alf en Danielle Coenen en Mark en Jacqueline Seerden