Rogstaekerspreens 2012 Stan I
 |
 |
 |
 |
 |
 |
 |
 |
 Dânsgroep beej uutrooping |
Z.D.H. Preens Stan 1e
Preens Stan 1e Ockers és zaoterdig 14 jannewari uutgerope tot Stadspreens 2012 van Wieërt. Stan 1e, spraektj uut as Stén, és 28 jaor gelieëje geboeëre op Luuëke. De Preens és de aodste van dréj wichter in ‘t gezin Ockers en ‘ne zoeën van Cor Ockers en Francien Smeets. Naeve zien broor Roy, (Jeugdpreens van de Rogstaekers in 1998) hieët oeëze Preens ouch nog ’n zöster Iris en és hae ‘ne kleinzoeën van de in Wieërt waal bekindje Cis de Kapper (Smeets) zaliger. Op 11-11-11 és Preens Stan getrawdj mét Nicole Looijen (‘n echt Ni-jwieërter maegtje) en woeëntj op de Kêrkstraot 148. Nicole és ‘n dochter van Johan en Marleen Looijen uut Ni-jwieërt en di-j wooere in 2007 ‘t Preensepaar van VV de Pinmaekers. Ziene jonge tiêd hieët oeëze Preens hoeëfdzakelik doeërgebrachtj in ‘t Zweeloeëreriêk en és dao in 1994 lid gewaesj vanne Jeugdraod van elluf. ’n Jaor later in 1995 hebbe ze Stan uutgerope tot Jeugdpreens van de Zweeloeëre. Later és hae ‘n aantal jaore lid gewaesj van VV de Pongelaors, di-j in ziene tiêd flînk aanne wieëg tummerdje mét groeëte waages in de optocht. Vanaaf 2009 zit hae nów as as jongste lid beej de 3 x 11 jaor Jubilieërendje Lambieck Knoup. Verder és oeëze Preens same mét mien vraw Nicole ongerdael van ’t vastelaovendj zangkwartet Zugabe en prizzentieërtj hae regelmaotig vastelaovendj-aktiviteite, mét as hoeëgtepûnt ‘t vuuërig jaor Harrie & de Gebroeëke Zwiêgelkes. Daonaeve stieët hae bekindj um op vastelaovendjmaondjig ederein gaer of neet gaer ‘ne snor te teikene.
De kost verdeentj hae op dit momênt mét hieël völ plezeer as Teamleider van kleinschâlig woeëne beej de Stichting Land van Horne op de lokâsie Zuyderborgh, lekker kort beej hoês.
Zien Orde:
Ederein hieët in zien laeve zien eige köfferke oftewaal rögkzékske bi-j zich, oeëze Preens hieët dan ouch ingestéldj de
“Orde van ’t Köfferke”
Zien Devies:
Uuteraard hieët oeëze Rogstaekerspreens ouch ‘n devies en zal hae dit jaor de Wieërter vastelaovendj vuuërgaon met zien devies:
Vae gaon …….. d’r aan!!!
Adjedânte van Preens Stan I
Op donderdig 19 jannewari zeen de adjedânte van Preens Stan I geinstallieërdj.
Oppe foto v.l.n.r.: Lenny Haanen, Roy Ockers, Nicky Linskens, Jasper Bokken, Nicole Ockers, Preens Stan I, Sharon Looijen en Rudi Veltrop.
Hans-Dieter Fischer en Nicole Moonen ontbraeke op dieës foto.
Mieër foto’s staon in de fotoalbum.
Dieës klup di-j de jeugd mejtrektj in ’t vastelaovendjgewêldj zal ouch ederein op de huuegdje haoje via Twitter en facebook, woeë ze uuthânge en waat ze allemaol mejmake.
Proklamâsie van Ziene Dorstlustige Hoeëgheid Preens Stan 1e
Vae, Preens Stan 1e, beej de grâsie van Vorst Jan, de Raod van Elf en de Rogstaekersvereiniging, geboeëre op Luuëke, aod jeugdpreens beej de Zweeloeëre (1995), getrawdj op 11-11-11 met Nicole en neet allein umdet ‘t St. Mêrte woor, jônkhieër van de Kêrkstraot, kleinzoeën van Cis de Kapper zaliger, aod marinier, jongste lid van de jubilieërendje Lambieck Knoup, aod Pongellaor, schoeën(e) zoeën van aod-preens Johan (VV de Pinmaekers 2007), groeëte fenk van Harrie en de Gebroeëke Zwiêgelkes, opperhaan binne de more van woeënzörgsentrum Zuyderborgh, 2e hands prizzentator van vastelaovendjaktiviteite, same met Nicole ongerdael van ’t zingendje kwartet Zugabe, ambassedeur van de Wieërter vastelaovendj in ’t Ni-jwieërter Pinnelandj, teikenaar van allerlei-j snorre op vastelaovendjmaondjig, vollieërdj studênt aan de Mestreechter Universiteit, gruuëtse bezitter van ’n groeët vastelaovendj hert, groeëte fenk van d’n Dênt, bewoongeraar van ’t Wieërtlands dialekt in zoeëwaal ’t laeze as ‘t schriêve, vastelaovendjveerder ’t hieël jaor doeër, gruuëts op de Wieërter vastelaovendj en alles waat mét vastelaovendj te make hieët.
Insteller van de “Orde van ’t köfferke”
doon uch te wieëte det:
1. vae lache en genete van dieëze tiêd woeë dejje eur zörg aan de kânt motj zette um plaats te make vör ‘t groeët Wieërter volksfieëst det vastelaovendj hetj
2. vae vînge dejje alles moogtj versieëre, neet allein straote, rame en gaevels, mer alles waat daonaeve nog los en vast hingtj
3. vae os verklei-je en schmînke wés neme os mieër herkindj en daomej laote mêrke det vae effe boete oeës eige trei-je op ’n schoeën en vuuëral nette meneer
4. vae ’t Wieërter dialekt de boeëvetoeën laote veure, neet allein in de aanloup nao vastelaovendj, mer ‘t hieël jaor doeër
5. vae d’r van uutgaon det ’t laeve eine groeëte verkânsie es, di-jjae moogtj boke en d’r zelf wat van motj make
6. vae d’r vanuut motte gaon det as 2012 volges de maja-kelender ’t indj beteikendj, vae dieëze vastelaovendj motte knalle as noeëts te vuuëre
7. vae op zôndig 12 fibberwari de stadssluuëtel in ontvangst moge neme en vae ‘t mét de vastelaovendj vör ‘t zégke hebbe
8. vae ederein aanspoeëre um op vastelaovendjzôndig mét oeës optochtdaelnemers te fieëste en neet wi-j ‘ne loeëte naeve de kânt te staon
9. vae uch allemaol trök wille zeen op vastelaovendjmaondjig um same mét eur wichter mej te doon of te kaome kieke nao oeëze wichteroptocht
10. vae uch op vastelaovendjdieënsdig beej de “Slaag umme Mêrrentj” allemaol mej huuëre zînge mét Retteketet, boem paaf alaaf.
11. vae, Preens Stan 1e herstikke gruuëts zeen um dit jaor vuuërop te moge gaon in de Wieërter vastelaovundj onger miên devies:
“Vae gaon ……. d’r aan.”
Wieërt, 12 fibberwari 2012 Z.D.H. Preens Stan 1e
Auch oeëze eige Stadspreens Stan 1 zal nao d’n optocht oppe busseng twieë leêdjes ten gehueëre breênge met zien eige zangkwartet Zugabe. Vae as Rogstaekers hoeëpe neteurlik dejje deês twieë nömmerkes oet volle borst meij gaotj zeênge. Kiektj um te oefene nao de vollegendje twieë Youtube-leênks. Völ sukses met oefene en vergaet neêt um fleênk meij te zeênge!
Zugabe met Vastelaovundj zoeë fein;
http://www.youtube.com/watch?v=k_iQK_3N4Eg
Zugabe met Proeëst;
VOLGTJ OS OP: