Herman Linssen nowwe drager van ‘t Kammeräödje 2011

15-01-2001

Op d’n ieërste Boonte Aovendj, vriêdig 14 jannewarie 2011, és de “Orde van ’t Kammeräödje" uutgereiktj aan aod-notaris Herman Linssen. Herman, geboeëre in ’t Uuleriêk Remundj, woeëntj al vanaaf 1956 in Wieërt, woeë zien vader e notariskantoeër haaj. Vanaaf 1960 wêrkdje Herman dao ouch en in 1970 noeëm hae det kantoeër oeëver um tot 1992 as notaris wiêd en breîd bekindj te waere. Daonao és hae actief gewaesj as mantelzörger vör zien aojers en vreejwilliger beej verpleeghoês St. Martinus.
Hae hieët altiêd völ tiêd gespendieërdj aan ziene hobby “De geschiedenis van ’t circus.” Daovör ging hae nao plaatse oeëver de hieël werreldj en dieëj o.a. ’n groeëte verzameling affiches beejeîn. As bestuurslid vanne Kerkelike Hermeni-j hieët hae de Wieërter Vastelaovendj good lieëre kinne. Nog altiêd ésse, raekening haojendj mét ziene laeftiêd, beej diverse vastelaovendjaktiviteite aanwieëzig. ’t Boorebâl zal hae noeëts oeëverslaon. Wi-j aod-Vorst Ton in 1989 mét ’t vuuërstél kwoom um mieër meziek inne optocht te kriêge, woor ’t Herman Linssen dae innegang aanboeëj privé garânt te staon vör de 1e, 2e en 3e Knoûwelpriês vör de Wieërter meziekgezelschappe. Dit jaor luîptj hae vör de 23e kieër mej.

Det financiëel gebaar és ’n fantastische aanvölling op ’t optochtbudget en wurtj neteurlik ouch doeër de meziekgezelschappe êrg gewaardieërdj.