Preens Marcel I Beelen és zaoterdig 15 jannewari uutgerope tot Stadspreens 2011 van Wieërt.

Marcel és 43 jaor gelieëje geboeëre oppe Schuttebeemd in de wiêk Groenewoud. De Preens és de dérdje van veer wichter in ’t gezin Beelen en ‘ne zoeën van Jan van de Lange Pier en Nelly Stuuëte van di-j bekindje wielrennersfemilie. Vör de aojer onger os, ziene opa haaj vreuger ’n tummerwêrkplaats oppe Roermondseweg.

Tiegewoeërdig woeëntj oeëze Preens same met Chantal van Eijndhoven op de Moeselschansweg 4, met ânger weurd, hae keumtj op dit momênt uut de stâl van de Vêrkusköp. Chantal es ’n dochter van Thieu vanne Smaus en Truus van Neyes Sjeng. Same hebbe ze ’n dochter van 16 maondj di-j luustertj nao de naam Anne.

In 1997 és Preens Marcel I adjedânt gewaesj beej zien aodste broor Preens Peter II van Wieërt en és hae 11 jaor lid gewaesj en fanatiek optochtdaelnemer met V.V. de Sousklöppels. Ouch roowdie beej Harrie & deGebroeëke Zwiêgelkes waas ein van zien bieëzighede en zörgdje dao vör ’t beer ônger ’t spuuële.

Woeë de mieëste minse Preens Marcel van zulle kinne és dét hae dik zieëve en un halluf jaor uutbater és gewaesj van kefee de Hermeni-j aan de Muntprommenade. In dae kefeetiêd es d’r ouch ’n plein nao de Preens verneumdj, namelik “Ut Oeeze leeve Bieëleplein” jaomer genog és dao nôw ’n appartemênt gebawdj.

Ziene boeëteram verdeendj hae tieëgewoeërdig beej de firma woeë hae ouch aktief woor vuuër dette de kefee haaj, ’t rôndbrînge van pakkette met un blauw böske van de firma Thijs expeditie in Wieert.

As hobbies deut oeëze Preens, wi-j kân ’t ouch ângers met zoeë’n femelie, nao ’t wielrenne kieke, zoeëwaal vuuër de tilleviesie als inne frisse locht. Nog ’n groeëte hobbie van Marcel és darten of waal aojerwets gezagdj voeëgelpikke beej dartklup De Cardinaal op Luuëke.

De Orde:

Aangezeen ze ieerder inne kefee altieëd repe “hey Bieëleménke dootj heej nog wat te dreenke of goeszj heej nog wat nieër, hieët hae de Orde ingesteldj van ’t Bieëleménke.

Devies:

Uuteraard hieët oeëze Rogstaekerspreens ouch ’n devies en zal hae dit jaor de vastelaovendj ingaon met zien devies:

“Vastelaovendj haodj uch vast, vae hale alles uut de kast!”