De vuuërzitter van de Limburgse Vereiniging van Karnavals Artieste (LVKA) Karel Fiddelers és oppe jaorvergadering vanne SLV (Samewêrkendje Limburgse Vastelaovesvereiniginge) 
unaniem vuuërgedrage vör towkinning van Orde vanne Gulden Humor 2011. As motivatie beej de doeër ’t SLV-bestuur gedaone vuuërdracht kwoom nao vuuëre det Karel Fiddelers al hieël völ jaore ’n groeëte betrokkenheid hieët en zich inzétj vör de Limburgse vastelaovendj en de belaeving daovan op hoeëg nivo héltj.
Inne tachtjiger jaore woor hao drej kieër Limburgs buuttekampoen. Ieërst as sikkertaris en vanaaf 1997 as vuuërzitter van de LVKA maaktj hae zich
stêrk vör de Limburgse vastelaovendjartieste en de organisatie van de Limburgse Buuttekampioenschappe. Sinds 2007 verzörgtj hae de redactie en prizzentasie van ’t tv-programma ‘Vastelaovend Same”.
De orde ‘Lid in de Broederschap van de Orde van de Gulden Humor’ weurtj vanaaf 1962 as hoeëgste Limburgse vastelaovesorde towgekindj doeër
de SLV aan kandidate di-j zich bezûndjer verdeenstelik hebbe gemaaktj vör de bevordering vanne laevesbli-jheid, de humor of de vastelaovendj en good bekindj zeen inne provincie Limburg.
De Orde és in 1962 vör de ieërste kieër towgekindj aan Charles Eyck, in 1963 aan Toon Hermans en in 1964 aan Godfried Bomans. Alles beejeîn és dieës Orde al 41 kieër uutgereiktj aan minse as: Willy Walden, Joseph Luns, Paul van Vliet, Guus Brand, pater Sangers, Mieke Bos-Janssen en Marion Lambriks en in later jaren aan: Jan en Pierre Huijskens, Jeu Sprengers,Thijs Wöltgens, Lei Meisen, Martin Eurlings, Jan Smeets, Willem Vermeend, Pierre Cnoops, Maria van der Hoeven en Alf Poell. Ouch organisaties kaome beej dieës Broederschap vuuër, zoeë as: ’t Limburgs Symphonie Orkest, Limburgs Schuttersgilde, Limburgse Bond voor Muziekgezelschappen, Bond van Carnavalsverenigingen in Limburg en ’t Limburgs Vastelaovesleedjes Konkoer.
De uutreiking vingtj in principe plaats oppe léste zaoterdig van november van einig jaor. In 2011 zal det zeen op 26 november beej de C.S. De Mirlitophile 1879 in Valkenburg.
