De NOS zal op vastelaovendjzoondig 19 fibberwari live uutzende vanaaf de Bassin in Wieërt. In di-j uutzending laote ze bieëldje zeen van de groeëte Wieërter Rogstaekersoptocht dae smiddes doeër Wieërt trok. Oppe Bassin és roond dae uutzendtiêd e Super Vastelaovendjfieëst aanne gang mét völ optraejes van artieste.
Det vastelaovendjfieëst op ‘t boetepodium aanne Bassin begintj aansloêtendj aan d’n optocht en deurtj van 16.30 oor tot ca. 19.30 oor. E paar name van artieste op ‘t ‘Super Vastelaovendjfieëst’: Harry (van de Gebroeëke Zwiêgelkes), Joss Mennen & Vreende, Ronald & Carien, Thon Wolter, Ed & Frans en de Sauna Boys.
Uutzendtiêde NOS en L1
De NOS zal van 17.00 tot 19.00 oor op Nederland 2 live verslaâg doon van ‘t vastelaovendjfieëst. De prizzentatie és in hang van Rozemarijn Moggré (presentatrice van ‘t NOS Jeugdjournaal) en Tom Doesborg (prizzentator L1). De Limburgse zender L1 zendj dezelfdje zoondigaovendj al ‘n samevatting vanne Wieërter optocht uut van 21.00-22.00 oor. Op maondjig 20 fibberwari zendj L1 de optocht twieë kieër in zie gehieël uut, um 14.00 oor en nog ‘s um 23.00 oor. Daobeej weur’t commentaar verzörgdj doeër Robert Janssen (van L1) en Wieërtenaar Dorus van den Bosch.
Groeëte optocht
D’n optocht van Wieërt weurtj aangeprieëze as de schoeënste en groeëtste optocht van Limburg. Mét bekans 100 daelnemendje groepe, koppels, einlinge, de schoeënste praalwages uut Limburg tréktj d’n optocht vanaaf 13.30 oor doeër de binnestad. De Rogstaekersoptocht stieët bekindj als ‘ne verzörgde, kleurige stoet dae de noeëdige humor op straot bringtj. Vörâl de kleiner groepe, koppels en einlinge brînge dék e stökske straottheater. De route gieët oeëver de Driesveldlaan – Wilhelminasingel – Bassin (camerastandpûnt NOS/L1) – Kasteelsingel en Emmasingel.
Mieër informatie oeëver d’n optocht en ‘t vastelaovendjfieëst és te vînge oppe website vanne Rogstaekers: www.vvderogstaekers.nl
Bassin daels aafgesloeëte
Vanwieëge de op- en aafbouw van ‘t vastelaovendjfieëst és de Bassin van zaoterdagmiddig (nao de waekmêrrentj) tot maondjigmêrge roond 12.00 oor gedaeldjelik afgesloeëte. Det beteîkentj det verkieër waal de stad uut kân via de Bassin, mer neet de stad in (route Eindhovenseweg-Bassin-Wilhelminasingel neet muuëgelik). Me kân waal de stad in via de route Eindhovensewieëg-Kasteelsingel.
