Zaoterdig 5 jannewari nao aafloûp van de Gala Boonte Aovendj in ’t Munttheater és tot Stadspreens 2013 uutgerope Godain Weerts. Preens Godain 1e és ‘ne zoeën van aod Stadspreens Fred 1e (1971) en Toot Caris. De Körsvörse Preens és getrawdj met Marlie Kessels en same hebbe ze drej wichter, Goof, Madeleine en Juun. ’t Gezin Weerts woeëntj op de Hushoverweg 96 in Wieërt.
Preens Godain és geîne onbekindje in ’t Wieërter vastelaovendjwêrreldje, zoeë deut hae al jaore mej in de groeëte Wieërter Rogstaekersoptocht met de groep “Di-j van Os en Vae”. Ouch zien Marlie is geîn onbekindje, same met ’n paar gooj vrîndinne és ze ’n vaste waerde in de optocht en beej de Slaag um de Mêrrentj op vastelaovendj-dieënsdig, woeëbeej Preens Godain dan as eure manager van de perti-j és.
Sportief és oeëze Preens ouch geîne onbekindje, in zien jeugdjaore woor hae ’n vaste waerde in ’t 1e basketbalteam van Ieëredevisie Klup Coveco BSW, in dae tiêd det ze nog spuuëldje in Sporthal Luuëke vör ruum 1400 tówschouwers. Nao zien aktieve basketbal karriëre és hae wieër gaon voetballe beej Wilhelmina en spuuëltj dao tot op vandaag nog stieëds in ’t 3e elftal. Verder gieët hae gaer buude vör aojer op Crosmoor en légktj gaer ’n kaertje beej Bridgeklup Wieërt.
Vanaaf 1998 és oeëze Preens zien eîge bedriêf begonne onger de naam Wetec en advizieërtj bedriêve oeëver de inzet van IT apparatuur, in 2005 hieët hae Becs Computers oeëvergenoeëme, tieëgewoeërdig Becs IT Services en advizieëre en behieëre hôngerte bedriêve in ’t zuide van ’t lând op ’t gebeed van IT.
De Orde di-j Preens Godain 1e hieët ingesteldj és de “Orde van de Hivoplmedida” waat wieër verwiêsj nao zien devies:
“Hivoplmedida, ……….. hieël völ plezeer met di-j daag”
Vör mieër informasie: PREENS
