Op de Boonte Aovendj van vriêdig 16 jannewarie 2015 és doeër Vorst Jan de Groeët-Offeseer in de Orde van de Rog uutgereiktj aan Adrie Hendriks. Adrie, lid vanaaf 1995, hieët zien spoeëre in verschillendje kemissies waal verdeend. Begonne beej de Jeugd woor hae al gaw vuuërzitter van de Jeugdkemissie. In dieës kemissie hieët hae ‘ne gehieël nówwe opzet van de organisatie beej de jeugd opgezatte. Adrie woor ’t ouch dae op de lieëgere schoeële ’n vastelaovendjpakket introdusieërdje, waat bestong uut ’ne videobând met vör de wichter o.a. ’t Vastelaovendj-journaal met völ wichter vastelaovendjnoets en filmopnames met in de hoeëfdrolle Ed & Frans, di-j de mieëst gekke capriolen uuthaaldje. Daonaeve bestong det pakket uut de CD met de Wieërter vastelaovendjslagers, posters um op schoeële op te hânge en folders met wichteraktiviteite um uut te daele aan de schoeëljeugd. Verder woor Adrie ouch ’n groeët aantal jaore Jeugdpreensebegeleider.
Nao zich völ jaore verdeenstelik te hebbe gemaaktj beej de Jeugd és hae oeëvergestaptj nao de kemissie PR woeë hae de website onger zien hoede kreeg en nog hieët. Zieëker in de beginjaore van de website ’n hels karwei um alles gevöldj te krieëge. Naeve de website és Adrie ouch oeëze eîge hoêsfotograaf en legktj alle aktiviteite van VV De Rogstaekers vast op bieëld um ze daonao weer te plaatse oppe website. Vanuut de PR és Adrie de groeëte coördinator beej de vuuërrizzervieëringen en kaartverkoup van alle groeëte Rogstaekers evenemênte.
Of det nog neet genogt és, és Adrie lid gewaesj van de kemissie FOS, woeëbeej de organisatie van de “Slaag um de Mêrrentj” onger zien hoede veel en nog véltj. Sinds 2013 vuuërzitter van de kemissie LOP met o.a. de organisatie van de Boonte Aovendje en vanaaf 2015 de organisatie van de Hieërezitting. Ouch in de wêrkgroep artistiek beej oeës organisatie van de Gulden Humor en 8 x 11 “Efkes wat ângers” hieët Adrie ‘ne groeëte inbring gehadj in ‘t gehieël.
Vanwieëge boeëvestaondje verdeênste és de “Groeët-Offeseer in de Orde van de Rog” dan ouch zieëker op ‘n gooj plaats terecht gekaome.
