Iris van der Zanden: Ieëre artiest vanne Boonte Aovendj

17-01-2015

Op de léste Boonte Aovendj van zaoterdig 17 jannewarie 2015 és aan Iris van der Zanden de titel “Ieëre Artiest” tówgekindj vör zien groeëte verdeenste aan de Rogstaekers Boonte Aovendje.

Iris, vanaaf 1997 beej de Boonte Aovendje betrokke, woor altiêd eîn van de stuwendje krachte van de artiestegroep. Kleîn mer dapper en as artiest vör alles inzetbaar. Of ’t nów as aangaever of inkopper woor, as figurânt of hoeëfdrolspuuëlster, in ‘n groeps-scétch of solo, Iris schro nêrgus vör trök.

Iris és 'ne echte doêzendjpoeët oppe buun. Oeëze eîge Wieërter “Wendy van Dijk”. Iris zetj alle soeërte en maote typetjes nieër, van “Goojse Madam” tot het type “Ma Flodder” en van schoeëlmaegtje tot aoj vraw. In ’t kort gezagtj: Iris és 'ne rasartiest.

Daonaeve hieët Iris jaorelângk (bepaoldj neet onverdeenstelijk) as entertainer mejgewêrktj aan de Wichterfieëstmiddig.

Helaas hieët Iris dit jaor te kinne gegaeve te gaon stoppe as Boonte Aovendj artiest. Vae as Stadsvastelaovendjvereniging De Rogstaekers^ zeen dan ouch gewêldjig gruuëts det vae al jaor en daag en allemaol vör de lôl en de flawwekûl, Iris in oeës midde hebbe gehadj.