|
|
 |
Zaoterdig 10 jannewari és nao aafloûp van de Gala Boonte Aovendj in ’t Munttheater uutgerope tot Stadspreens van Wieërt, Luuk 1e Knapen. De nówwe Preens is ‘ne zoeën van Frans en Mari-Nell Knapen-Lempens en woeëndj op ‘t memênt van zien uutroping nog thoês op de Wilhelminasingel in Wieërt.
Preens Luuk (29) és geîne onbekindje in ‘t vastelaovendjwerreldje, as zoeën van aod Preens Frans 2e (1980) és de vastelaovendj thoês aan oeëze Hoeëgheid met de paplieëpel ingegaeve. In de jaore 1996 en 1997 waas hae lid van de Rogstaekers Jeugdraod van 11, leep mej as bordjesdrager in de groeëte Rogstaekersoptocht met VV “Ut moog geîne naam hebbe” en maakdje meziek beej TTZ D’amazuur . Op latere laeftiêd waas hae in de optochte te vînge as Klarinettist beej de Stedelijke Hêrmeni-j St. Antonius.
Oeëze körsvörse Preens Luuk 1e hieët ‘n relâsie met Sylvie Sijben en ouch vör Sylvie és de vastelaovendj neet vrieëmdj, zoeë waas ‘t in 1999 Jeugdpreenses beej de Moêzevângers op Laor. Same hebbe ze ‘n hoês gekochtj oppe Maria Wijngaard 15, woeë ze al bekans twieë jaor aan ’t verbawwe zeen, kort nao de uutroping hoeëpe ze same te verhoêze en d’r ‘n Preenselik bestaon op te bawwe.
Nao zien opleiding Vastgoed en Makelaardij in Eindhoven es oeëze Hoeëgheid aan de slaag gegânge as makelaar beej René Dwars Makelaardij aan de Emmasingel. Nao zien drökke baan als makelaar wétj hae toch ouch tiêd te vînge vör zien groeëte hobbie meziek make. Zoeë waas hae ieërder al klarinettist beej St. Antonius, spuuëldje saxofoon beej ’t Rogstaekers-orkést “Efkes wat ângers” tiêdus ‘t 8 x 11 jubileumfieëst en és regelmaotig te vînge as gastspuuëler achter ‘t drumstêl beej Dial 24.
De orde di-j Preens Luuk hieët ingesteldj és de “Orde van de Slieps”
Umdet oeëze körsvörse Preens oeëverdaag tiêdus zien wêrk meîstal ‘ne slieps um hieët en nog ‘s gaer ’n fieëstje mejveertj, és zien devies dan ouch:
“Slieps um, …… daâk d’r aaf!!”
