Thijs Vleeshouwers: Groeët-Offeseer

17-01-2015

Op de Boonte Aovendj van vriêdig 16 jannewarie 2015 és doeër Vorst Jan de Groeët-Offeseer in de Orde van de Rog uutgereiktj aan Thijs Vleeshouwers.

Thijs, lid vanaaf 1999, és beej zien aantreî-je as lid binne de vereîniging gestartj beej de Kemissie PR. Binne dieës kemissie woor hae mede verantwoeërdelijk vör alle persberichte, de vastelaovendjgezet en ’t drökwêrk. Tot 2010 woor hae ouch de vaste sikkertaris van dieës klup.

Van 2000 tot en met 2008 woor Thijs naeve de kemissie PR ouch de sikkertaris van de Jeugdkemissie. In dieës kemissie zörgdje hae as sikkertaris ouch eder waek vör ’t jeugdprogramma en zoeë op z’n eîge meneer det ’t vör de jeugd ’n fieëst woor dit te laeze. Naeve ’t sikkertariaat van de Jeugdkemissie woor hae ouch ‘n groeët aantal jaore de jeugdpreensebegeleider,  zörgdje eder jaor weer vör ‘ne good samegesteldje Jeugdraod en woor altieëd presént beej ’t uuttrekke van de jeugd.

As jeugdpreensebegeleider kwoom hae dan ouch terecht in de kemissie P&P (Preense en Prizzentâsie), en kreeg in 2009 de belângriêke taak as begeleider van de Groeëte Stadspreens. Vanaaf ’t vraoge tot en met ’t aaftreî-je, ruum 4 maondj later és Thijs dao intensief mej bieëzig. Tot op de daag van vandaag deût hae det nog met hieël völ plezeer.

In 2011 kwoom Thijs in ’t bestuur terecht en hieët hae de neet onbelangriêke taak op zich genoeëme van vereînigings-sikkertaris. Ouch heej weer kwoom hae op zien eîge meneer met de info’s vör de lede en bracht op ’t indj van ’t sezoen ’t jaorverslaag uut, vergezeldj van völ foto’s en op ‘ne gehieël nówwe lay-out.

Of det nog neet genogt és, és Thijs lid gewaesj van verschillendje wêrkgroepe. Zoeë waas hae in 2010 naw betrokke in de wêrkgroep artistiek beej de organisatie van de Gulden Humor in Wieërt. Verder in 2014 in de wêrkgroep artistiek beej de organisatie van ‘t 8 x 11 jaorig jubileum “Efkes wat ângers” en de musical "Rogstaekers, de Legende" op de Mêrrentj. Naeve zien drökke Rogstaekerswêrk vîngtj hae toch altiêd weer tiêd um met zien Joekskepél op stap te gaon.

Vanwieëge boeëvestaondje verdeênste és de “Groeët-Offeseer in de Orde van de Rog” op ‘n gooj plaats terecht gekaome.