Prizzedént Raymond Vlecken van de SLV (Samewirkende Limburgse Vastelaovesvereniginge) hieët de “Orde van de Zilveren Buut” uutgereiktj aan Pedro Heesterbeek. Det gebuuërdje op maondjig 12 jannewar1e 2015 tiêdes de Boonte Aovendj van De Rogstaekers in 't Munttheater.
Pedro huuërtj zoeë ongevieër beej de inventaris vanne Boonte Femiêliemiddig. Al vanaaf 1990 (ruum 25 jaor) maaktj hae dael uut van 't gezelschap dét d’r jaorliks vör zörregtj dét ouch aan de jongste jeugd ‘t Vastelaovendjvirus weurtj oeëvergedrage.
In de beginjaore verzörgdje hae, same met z’n vreende van Vastelaovendjvereiniging de Wiepkes, de invölling as artiest van de (toen nog) Boonte Wichtermiddig, op dit memênt es hae nog de einigste mejwêrker uut dieës groep.
Ouch hieët Pedro nao zien actieve rol as artiest, in ieërste instantie jaorelangk as soufleur beej de Boonte Wichtermiddig mejgedrejd.
Op 't memêntj dét de Rogstaekers 'ne regisseur noeëdig haaje um now artieste de kneepjes van 't vak beej te brînge woor Pedro, same met zieëne vaste kompaan Rosan Camp, berédj um dieës rol völ enthousiasme op te pakke.
Hae zétj zich met zeel en zaligheid in en daobeej és neet allein de regie z'n wêrk, mér ouch 'n dael van de productie van dit wichterspektakel huuërtj tot zien takepakket. 't Mot gek gaon as Pedro neet beej alle rippetities van dieës Wichtermiddige aanwieëzig és.
Ouch hieët Pedro zoeë'n 10 jaore mejgedaon aan de Boonte Aovendje van oeës zöstervereîniging De Zweeloeëre.
Naeve boeëvestaondj bühne- en theaterwêrk waas hao ouch 'ne fervênte daelnemer aan de Wieërter optocht met VV De Wiepkes en jurylid beej ’t lidjesfestival aafgeloupe jaor, breîd inzetbaar dus.
