 |
 |
Vör de léste kieër hieët Brigitte van Eck van ‘t Munttheater op ’n ludiek meneêr de sluuëtel van ‘t theater oeëvergedrage aan Vorst Jan van Stadsvastelaovendjvereiniging de Rogstaekers uut Wieërt. Op de 11e vanne 11e és Vorst Jan begónne aan z’n ‘aafscheidstournee’. ‘t És dan ouch ‘t léste jaor det hae de Boonte Aovendje aan ‘t Wieërter publiek zâl prizzentieëre.
Van 12 t/m 21 jannewarie brînge de Rogstaekers weer 10 Boonte Aovendje en 2 Boonte Femiêliemiddige op de plênk. In dieës periode wûrtj ‘t Munttheater umgebawdj tot Rogstaekerspeliês. D’r wûrtj al maonjdelânk drök gerippetieërdj en haard gewêrktj aan de decors. Op zaoterdig 14 jannewari stieët de Gala Boonte Aovendj op ‘t program met as hoeëgtepûnt de uutroôping van de ‘Rogstaekers Stadspreens 2017’. De daag d’rop és z’ne jeugdige collega aane buuërt. Aansloêtendj aane Boonte Femiêliemiddig van 15 jannewari wûrtj de ‘Rogstaekers Jeugdpreens 2017’ uutgeroôpe.
De Rogstaekers prizzentieëre de Boonte Aovendje dit jaor ónger de titel ‘Nein… Gae hétj schoeën kni-jje!’ en de Boonte Femiêliemiddig ónger ‘t thema ‘Woeë droûme uutkaome’.
Kiêktj vör de nog beschikbaar kaarte vör dieës vuuërstéllinge op www.munttheater.nl.
