Vuuërverkoup Wieërter 11

It giet opnow aon!: de Wieërter 11 op vastelaovendjmaondjig inne binnestad van Wieërt.
Dit jaor zal de Wieërter 11 komplieët in ’t thema staon van: SJONNIE & ANITA!

Ieërder dieës waek hejje heej al mieër oeëver kinne laeze en as dejje 't neet mieër wetj, dan hawtj  nog mer 's op dae gouwe knop en gaotj nao de speciaal pagina oeëver dit evenemênt.

Mer waat waal belangriêk és um te wieëte: Ouch dit jaor ki-jje GEIN kaarte rizzervieëre, mer zuldje uch beejein motte pakke um
op 13 jannewarie om 11:11 oor beej kefee De Tramhalt
te motte stri-jje vör eur daelnemerskaart.
Beej dieës kroegetocht trekdje met völ spektakel, knoûwel en 'ne houp Wieërter artieste langs 11 kefees inne binnestad. Beej eeder kefee kriegdje 'n consumptie en 'ne stêmpel en beej 'n vôl kaart ouch nog 's un schoeën herinneringsspeldje. 'n Daelnemerskaart kosj 20 euro.
Let op!: Gae kintj maximaal 6 kaarten per persoon kriege en kintj allein kontânt betaale! VÔL és VÔL!

Daelnemendje kefees zeen: de Apostel, de Brouwer, du Commerce, Gotcha, de Gruyter, de Hermeni-j, de Mân, de Soos, de Stuiterbal, 't Swaentje en de Tramhalt.

De Wieërter 11 és ’n initiatief en evenemênt van e paar jóngeluj mét oongerstuuëning van de Rogstaekers oppe achtergroond.