De oeëpening van ’t vastelaovendjsezoen op d’n 11e van d’n 11e laote de Rogstaekers neteurlik neet aan eur naas vörbeej gaon. In de theaterzaal van De Huiskamer aan de Wilhelminasingel hultj de vereîniging vanaaf 20:00 oor ‘n fieëstelikke jaorvergadering, woeëbeej ouch genuuëdigdje aanwieëzig zeen. Naodet alle dragers van ’n staek dit attribuut weer op eure kop hebbe gezatte ten teîken, det ’t sezoen és geoeëpendj, wurtj ’n aantal now lede geïnstallieërdj. Ouch waere d’r ettelikke Hoesordes en Ridderordes uutgereiktj en zeen d’r bedânkwuuërd en decoraties vör Lede van Verdeenste. De Prizzedênt vanne Senaat zal ouch ’n beejdraag levere. En wieter wurtj ’t ontwêrp getoeëndj van ’t Rogstaekerpinke en de Stiêpelmedalie. Linda Jacobs hieët zich dao dits kieër mej bieëzig gehaoje. Nao aafloup vanne vergadering, zoeë roond de klok van hâlf tieën, beguftj ’t hieële gezelschap zich nao ’t Theaterkefee, woeë vanaaf det momênt ouch ânger geïnteressieërdje van herte welkom zeen. De aanwieëzige könne dao de gedecorieërdje de hând schödde, gezellig klasjenieëre beej ’n draenkske en gaon luuëstere nao ’t Wieërter Vastelaovendjlidje vör 2020, det live wurtj vertolktj. En d’r és ouch ’n deejay um de stumming d’r lekker in te haoje.
