Tiêdus de installatie van de Preense in 't stadhoês op 16 fibberwarie 2020 waerdje de beneuming bekindj gemaaktj van Peter Wulms tot Groeët-Offeseer in de Orde van de Rog.
Peter és vanaaf 1998 lid van de Rogstaekers en és zieëker in zien beginjaore naw betrókke gewaesj beej de Jeugdkemissie. Sinds 2010 és hae betrókke beej de begeleiding van de Rogstaekerspreens. Vanuut zien functie as Preensebegeleider és Peter in de kemissie P&P terechtgekaome en hieët dao meinig jaor de kér getrokke as vuuërzitter. Ouch és hae jaore actief gewaesj vör de toenmalige kemissie “Lôl oppe Plênk”, woeë hae as Rogstaeker verântwoeërdelik woor vör de Boonte Femiêlie Middig. ‘ne Mins wie Peter Wulms és d’r eine uut doêzendje; ‘ne mins dae vör de Wieërter vastelaovendj in ’t algemein en Stadsvastelaovendjvereîniging De Rogstaekers in ’t bezûndjer goud waerd és.
