Rogstaekers schale vastelaovendjsezoen nog wiêter trök

29 oktober 2020

 

As gevôlg vanne aangeschêrpdje Coronamaotregele wûrtj ‘t vastelaovendjsezoen van 2020-2021 in Wieërt nog wiêter uutgeklédj. Begin oktoeëber maakdje Stadsvastelaovendjvereîniging De Rogstaekers bekindj dét alle groeëte, traditionieël evenemênte ‘t kaomendj sezoen neet doeër zölle gaon. Ónger ‘t devies ‘Knouwel en plezeer, op ’n anger meneer’ és haard gewêrktj aan ‘n alternatief program inclusief de uutrooping van twieë Stadspreense. Ouch doeër di-j planne wûrtj noow ‘n streep gezatte.

 

Gezóndheid, veiligheid en belaeving

Alle alternatief planne zeen continu getoetsj aane géldendje maotregele, woeëbeej gezóndheid, veiligheid en belaeving as lejdraod zeen gehantieërdj. Met positief realisme és gekiêke nao waat waal kân in plaats van waat neet kân. Noow de maotregele oppernoets zeen aangeschêrptj, ‘t aantal besmettinge op bliêftj loûpe en ‘t lând in ‘n gedaeldjelikke lockdown zitj, és ‘t momênt gekaome um ouch dao ‘ne pûnt achter te zétte. De Rogstaekers wille richting ‘t pebliek vuuërâl uutstraole dét gezóndheid ‘t állerbelangriêkste és.

Gein Stadspreense

De actueel situâsie hieët gelédj tot ‘t besloeët um in ‘t jaor 2021 gein Stadspreense in Wieërt uut te roôpe. Interim-vuuërzitter Jasper Heesakkers: “D’r stóng ‘n schitterendj alternatief program vör oeës Stadspreense inne steigers, woeëbeej beide Hoeëghede de unieke taak kreêge um minse in dieëze lastige tiêd te ontzörge en heûr ‘ne lach op ‘t gezicht te brînge. Mer ouch di-j planne hebbe ‘ne grens en vae gaon de réntjes neet opzeûke. Langs dieëze wieëg wille vae oeës beaûgdje Hoeëghede dânke vör heûr enthousiasme en begrip.

Vastelaovendj és Springlaevendj

‘t Ontbraeke van groeëte evenemênte, optochte en Preense, betaekentj neet dét ‘t vastelaovendjgeveûl neet geraaktj kân waere. Wieërtenare hebbe as geboeëre Rogstaekers de vastelaovendj immers in heûr hért gesloeëte. Daorum wûrtj tiêdes de vastelaovendjperiode de binnestad geseêrdj, véltj Vastelaovendjgezét ‘De Rogstèker’ beej ederein inne bös en wûrtj d’r ’n fônkelnow ‘Ich bin ‘ne Rogstaeker’ speldje geprizzentieërdj. De échte leefhebbers kunne heûr vastelaovendjhért ophale beej de tentoeënstélling ‘Vastelaovendj és Springlaevendj’, verschillendje online aktiviteite en speciaal uutzendinge van ‘Rog Tillevies’. Mieër informâsie oeëver dieës aktiviteite wûrtj op ‘n later momênt bekindj gemaaktj.

Kanseleer Jasper verteltj oeëver de aanpassinge van 't vastelaovendjprogram i.v.m. de maotregele van de oeëverheid


Tags: -

Kiektj ouch us beej:

11 november 2020

’t És vandaag de 11e vanne 11e, de markieëring van de start van ’t viêfdje sezoen. Mer de vastelaovendj zâl kaomendj jaor met de stil trom aan os vörbeej trékke. D’r zeen op dit momênt…

Vae gaeve ‘t Vastelaovendjveûr doeër!

Lees meer

13 oktober 2020

  Op 9 oktoeëber hebbe vae ’t trieste bericht ontvânge det oeës ‘Kammeräödje’ John van Hoef os plotseling és ontvalle. John woor ‘ne mins dae zich jaorelânk met völ passie hieët ingezatte vör de Wieërter…

In Memoriam: John van Hoef

Lees meer

2 oktober 2020

‘t Veûr mót bliêve börre: Waal Stadspreense in Wieërt, echter gein traditionieël activiteite Noow Corona de wéreldj in z’n greep hieët, és de Vastelaovendj wi-j vae gewindj zeen um dae te veêre zieëker neet realistisch….

Knouwel en plezeer, op ’n ânger meneer

Lees meer
Mieër noets