UPDATE 04-11-2021
Stadsvastelaovendjvereîniging de Rogstaekers stéltj uutrooping nowwe Vorst uut.
De droûm vanne vastelaovendj blieftj, mer vanwieëge de oploupendje coronaciêfers zölle de planne di-j gemaaktj zeen vör de oeëpening van de Wieërter vastelaovendj tot nader order uutgestéldj waere.
De spectaculaire show oppe Beest met as apotheose de uutroeping en installatie van de nowwe Vorst en de aansloêtendje fieëstaovendj in de Poort van Limburg op zaoterdig 13 november zölle neet doeërgaon.
“ ’t Veultj neet good um met völ bombarie ‘t vastelaovendjsezoen te oeëpene en te waere geïnstallieërdj tot Vorst, terwiêl op slechs înkel hóngerte maeters aafstând minse ligke te vechte vör heur laeve in ‘t Sint Jans Gasthoês,” aldus de aanstaondje Vorst.
D’r zâl op ’ne latere datum ’n gepasj momênt gezóchtj waere um de uutrooping en installatie van de 6e Vorst van Wieërt doeër te laote gaon.
’t Ligktj in de lien der verwachtinge det de huidige situatie ouch consequênsies zâl hebbe vör de festiviteite roôntelum de uutreiking van de Gulden Humor op 26 en 27 november. Vae zeen in oeëverlégk met de instânties en zölle heej later op trök kaome.
Oorsprônkelikke tekst:
Aansloêtendj aan de uutroôping en installatie van de Nowwe Vorst op de Beest op zaoterdig 13 november zâl um ongevieër 20:30 oor in de Bâlzaal van de Poort van Limburg ‘ne fieëstaovendj plaatsvînge um de oeëpening van ‘t nowwe vastelaovendjsezoen te veere. Uuteraard és heej vôldoôndje gelaegenheid um de nowwe Vorst van Wieërt gelök te wînse. ‘n Muzikaal programma met o.a. Beppie Kraft, Marleen Rutten en Stefan Wolter zâl ‘t vastelaovendjgeveul complieët make.
De entree és vör ederein, geklédj of verklédj, gratis. Waal zölle de maotregele in acht genoeëme waere en zâl d'r um 'ne coronacheck gevraogdj waere.
