Bookprizzentatie ‘Juul, de kleine kwânte kwakkert’

2 oktober 2021

Op vriêdig 1 oktoeëber és in de historische Paterskêrk oppe Beest de bookprizzentatie gewaesj van ‘Juul, de kleine kwânte kwakkert’. De ieërste exemplare zeen doeër Kanseleer Jasper Heesakkers uutgereiktj aan börgemeister Raymond Vlecken en aan Bart Maes, prizzedênt van de Samenwirkende Limburgse Vastelaovesvereniginge. ’t Book wurtj uutgebrachtj in de aanloup nao de Gulden Humor in Wieërt op 26 en 27 november. ’t Verhaol és geschrieëve doeër Mark Bouwmans en de prênte zeen geteîkendj doeër Rob Jacobs.

 

Uniek verzamelobject vör dialectleefhebbers

‘Juul, de kleine kwânte kwakkert’ és ’n now sprookjesbook, geschrieëve in 17 Limburgse dialecte. ’t Verhaol gieët oeëver de kleine kwakkert Juul. Hae és gek van sprookjes en van vastelaovendj en droûmtj d’r van um doeër ‘n knappe prinses tot preens te waere gekusj. Um zien prinses te vînge hieët hae ‘ne touverdrânk noeëdig, bestaondje uut 17 verschillendje bestânddaele, di-j te vînge zeen in de 17 plaatse, di-j zeen aangesloeëte beej de Samenwirkende Limburgse Vastelaovesvereniginge. Waat dit book extra bezûndjer maaktj, és det ’t és geschrieëve in 17 verschillendje Limburgse dialecte, eder pagina in ’t dialect van de plaats, woeë ’t avvonteur zich aafspuuëltj. Oppe léste pagina van ’t prookjesbook zeen vör ’t laezersgemaak twieë QR-codes towgeveugdj, woeëmej de Nederlandse vertaling en de vertaling in ’t Wieërter dialect kunne waere opgehaaldj.

Vuuërrisservieëring en verkoupadresse

’t Sprookjesbook wurtj einmaolig in bepêrkdje oplaag uutgebrachtj. Um leefhebbers de kâns te gaeve ’n exemplaar te bemachtige és d’r gewêrktj mét ’n vuuërrisservieëring. Dao és massaal gebroêk van gemaaktj en d’r zeen hóngerte beûk besteldj. Ophale van dieës gerisservieërdje exemplare és op zaoterdig 2 oktoeëber tösse 10:00 en 14:00 oor beej de Wertha Brewpub aanne Busséng 6 in Wieërt. En zoeëlang d’r vuuërraod és kân ’t book ouch waere gekochtj beej:

  • Bruna (Mêrrentj 11-13)
  • Warenhuis conceptstore (Bieëkstraot 54)
  • Primera Wouters (Oranjeplein 231) en
  • The Read Shop Express (St. Jobplein 8).

De Orde van de Gulden Humor

Sieër 1962 wurtj de Orde van de Gulden Humor as hoeëgste Limburgse vastelaovendj-óngerscheî-jing uutgereiktj doeër de Samenwirkende Limburgse Vastelaovesvereniginge (SLV). Dit jaoer wurtj dieës óngerscheî-jing towgekindj aan acteur Huub Stapel. Stadsvastelaovendjvereîniging De Rogstaekers zal de uutreiking fieëstelik umliêste mét twieë evenemênte op 26 en 27 november in Sporthal Boshoven. Op dieës aovendje prizzentieërtj de vereîniging ’n sprookjeséchtig vastelaovendprogramma mét hieël völ artieste, woeë-ónger Beppie Kraft, Spik en Span, Bjorn en Mieke, Marleen Rutten, De Toddezèk, Hoondervél en W-Dreej. Alle informatie oeëver ’t programma en de kaartverkoup és te vînge op www.guldenhumor2021.nl.

 
Inne Wertha Brewpub waas 't zaoterdig 2 oktoeëber 'n kaome en gaon van minse, di-j eur gerisservieërdje exemplaar van 't sprookjesbook koeëme aafhale. Oppe foto kriegtj May Steen 't book uutgereiktj doeër Jan van de Port. Inne midde Wil Berben, dae de administratie beejhieël.


Foto's van de bookprizzentatie inne Paterskêrk staon in de âlbum van 2021.


Tags:

Kiektj ouch us beej:

3 september 2021

MUUËGELIKHEID TOT VUUËRINSCHRIÊVING Juul, de kleine kwânte kwakkert Uniek dialectsprookjesbook in gelimitieërdje oplaag verkriêgbaar Stadsvastelaovendjvereîniging De Rogstaekers uut Weert prizzentieërtj Juul, de kleine kwânte kwakkert, ‘n uniek sprookjesbook, geschrieëve in 17 Limburgse dialecte. Op 26…

Rogstaekers gaon uniek dialectsprookjesbook uutgaeve

Lees meer

5 februari 2019

Oppe maondjig kaome de besteurslede van de SLV (de Samenwirkendje Limburgse Vastelaovesvereiniginge) traditiegetraw nao de Boonte Aovendj in Wieërt. Det doon ze neet allein um ‘s lekker te kinne lache. Nein, mieëstal zette ze ouch…

SLV-Orde van Verdienste vör Stefan Jacobs en Dorus van den Bosch

Lees meer

20 juli 2018

  Zoeëas bekindj és de Gulden Humor vör 2018 towgekindj aan Europarlemnetariër Frans Timmermans. De fieëstelikke uitreiking heejvan vingtj plaats op zaoterdig 24 november in Eygelshoven. De organisatie is in hâng van de KV Burgerlust….

Uutreiking Gulden Humor

Lees meer
Mieër noets