De gepléndje festiviteite roôntelum de uutreiking van de Orde van de Gulden Humor op 26 en 27 november in Sporthal Bosseve gaon neet doeër. Dét hieët Stadsvastelaovendjvereîniging De Rogstaekers, as organisator, vandaag bekindj gemaaktj. De extra bepêrkinge vör evenemênte beteîkene dét ’t neet mieër muuëgelik és um de Gulden Humor doeër te laote gaon. De Rogstaekers laote wiête begrip te hebbe vör de ontstânge situâsie, al és ‘t neteurlik ‘n groeëte teluuërstélling vör alle betrókkene.
SLV-president Bart Maes: ‘Bedreûfdj en met völ pien in oeës vastelaoveshért hebbe de Samewirkende Limburgse Vastelaovesvereniginge kinnes genoeëme van ‘t besloêt um de ‘Gulden Humor’ te annulieëre. Chapeau vör de Rogstaekers en alle 180 vreejwilligers di-j de aafgeloûpe twieë jaor met völ enthousiasme, inzét, lôl en plezeer de vuuërbereidinge hebbe getroffe um ‘ne grandioze Gulden Humor op de plênk te zétte. Mer vuuërzichtigheid noow, vergroeëtj de kâns dét ‘t vanaaf 27 fibberwarie 3 daag ‘n groeët vastelaovendjfieëst és!’
De kaomendje paar daag gieët de organisâsie in gesprek met leveranceêrs, de gemeindje, vreejwilligers en stiepels um te kiêke of de Gulden Humor verplaatsj kân waere. As dét löktj dan bliêve gekochdje kaarte gewoeën gêldjig. Uuteraard és ’t ouch muuëgelik om ‘t gêldj trök te kriêge. Zoeëgaw heej mieër oeëver dudelik és zâl dit waere gecommunicieërdj via de bekindje (sociale) media en via www.guldenhumor2021.nl.
