Kammeräödje 2023 vör Gerdy Janssen-Hartholt

26-11-2022

De Orde van ‘t Kammeräödje és ‘n speciaal óngerscheiding van Stadsvastelaovendjvereîniging de Rogstaekers di-j hoeëguut eine kieër per jaor wurtj uutgereiktj aan ‘ne persoeën of groep dae zich op ‘n bezûndjer meneer en vörâl op de achtergrónd verdeênstelik hieët gemaaktj vör de Wieërter vastelaovendj in ‘t algemein en De Rogstaekers in ‘t bezûndjer.

Zaoterdig 26 november woeërt Gerdy Janssen-Hartholt doeër Vorst Jasper verrásj met de tówkinning van dieës groeëte ieër.

De laureaat és al vanaaf 2004 betrókke beej de Boonte Aovendje as grimeuse, klejjerdame én stuuën en towverlaot van de artieste.
Stad en lând woeërte aafgereisj um de zjuuste klejjer en accessoires op de kop te tikke en wannieër iets neet te koup blieëk, ging Gerdy aane slaag met naoldj en draod um dit zellef te make.
Ze hieët ‘n belángriêke beejdraag geleverdj aan ‘n professionelere inrichting van de kleidruuëmdje en hieët zich tösse sketches doeër dék in völ bochte mótte wrînge um artieste wieër oppe tiêd oppe bühne te laote verschiêne.
As loêsterendj oeër woor Gerdy daonaeve ‘n belángriêk bake vör de artieste, woeëbeej ze ouch altiêd positief kritisch woor tiêdes repetities en uutveûringe.
Ouch ‘n înkel gastrol in de Boonte Aovendje ging Gerdy noeëts uut de wieëg.

Neet allein beej de Boonte Aovendje, mer ouch beej de Boonte Femiêlie Middige, Wichterfieëstmiddige en groeëte evenemênte wi-j ‘t 8×11-jubileum en de Gulden Humor kós Stadsvastelaovendjvereîniging de Rogstaekers altiêd op de héndjige héndjes en enthousiaste mejwêrking van Gerdy raekene.
Vanzelfspraekendj és Gerdy ouch ‘n enthousiast vastelaovendjveêrster en zeuktj ze de evenemênte op, uuteraard prachtig geklédj en geschminkt.

Met recht és Gerdy Janssen-Hartholt e ‘Kammeräödje’ van De Rogstaekers te neume.

De uutreiking van dieës óngerscheiding zâl plaats vînge tiêdes de Boonte Aovendj van donderdig 26 jannewarie 2023 in ’t Munttheater.