Inne aanluîp nao de uutrooping vanne zézje Vorst van Wieërt hieët RogTillevies speciaal viêf aafleveringe gemaaktj van ’t programma “Laeve de Vorst, Vivat oeës Wieërt”.
In de ieërste aaflevering kieke vae nao ’n stökske gescheêdenis vanne Wieërter vastelaovendj. Wejjae wi-j vae aan de naam Rogstaekers gekaome zeen? Amateurhistoricus Erik Werps zócht ’t vör os uut.
Inne twieëdje aaflevering gaon vae ’t hebbe oeëver de 1e Vorst van Wieërt: Vorst Zjang Vaessen, mer ouch de historie van de vastelaovendjgezét ‘De Rogstèker’ keumtj aan bod. En wizjae dét vae in Wieërt oeëts 2 Preense in 1 hoêshaoje haaje?
In de dêrdje aaflevering és d’r vôlop aandacht vör de legendarische Vorst Jan Coenen, dae 22 jaor lânk as de 2e Vorst van Wieërt de Rogstaekersvereiniging met passie gelédj hieët.
Vae kalle met Ed Snaphaan oeëver de Boonte Aovendje en met ’n lid van de bekindje zaate hermeni-j “Um te Bäöke” hebbe vae ’t oeëver belaeving en betrókkeheid beej oeëze schoeëne Wieërter vastelaovendj.
In aaflevering 4 kieke vae gaon vae weem ouch alwieër de opvólger van Vorst Jan Coenen woor. Dét woor ieërst Regênt Jo (Solly) Bergmans en daonao neteurlik Vorst Ton Peeters.
Ouch kalle vae oeëver de belaeving van ’n bekindje zangeres: op de bühne és ze in heur elemênt, dan… gebuuërtj d’r wat!
In de viêfdje aaflevering kaltj Alf Poell met aod-Preens en Ieëre-Vorst Jan Stroek en met zien naef, aod-Boonte Aovendj-artiest en ouch aod-Preens Ed Stroek. Det doon ze beej ’n lekker pilske, kundig getaptj doeër – jaowaal – aod-Preens Marcel Beelen. Ouch börgemeister Raymond Vlecken keumtj aan ’t woeërd, dae verteltj woeë ‘ne vorst aan mot voldoon.
Naodet in de aafleveringe 1 t/m 5 és trökgekieëke op de vorstehistorie van Wieërt en d’r effe és gekaltj oeëver “Weem wurtj de nowwe Vorst” kaltj Alf Poell met (de op det memênt nog neet uutgeroope) Vorst Jasper oeëver wi-j de Wieërter vastelaovendj d’r ut mot gaon zeen, terwiêl d’r toch raekening wurtj gehaoje met ’t verlieëje en waat de kernpûnte van dieës veêring zeen. En neteurlik zeeje ouch nog effe ’n compilatie vanne uutrooping en installatie van Vorst Jasper met aansloêtendj de fieëstaovendj.
