Vör völ minse és ’t Boorebâl ’n evenemênt waat onlosmakelik verbônge és met de naderendje vastelaovendj:
“Zoonger boorebâl heb ich geine vastelaovendj”, zégke ze dan. Ouch dit sezoen és dur weer un fieëst oppe maondjigaovendj, umdet ‘ne knappe jong en ’n net maegdje vör eine aovendj e getrawdj stelke zulle zeen.
Op maondjig 6 fibberwarie 2023 és nao 3 jaor eindelik weer 'n Boorebâl gehaoje. De festiviteite begóste um 19:30 oor beej 't museum oppe Mêrrentj. Heej maakdje de femiêlie, de getuûge en alle aanwieëzige kinnis met 't broêdspaar Susanne en Florian. Naodet de trawweri-j haaj plaatsgevönge, trok 't hieël gezelschap vör de receptie en aansloêtendj de broêloft nao kefee De Brouwer oppe Oelemêrrentj. Heej waasj fieëst met optraejes van o.a. Marleen Rutten en Ron van Richting Roy.
Van 't hieël gebuuëre hieët Johan Horst 'n uutgebrèdje reportage gemaaktj. Di-j vingdje onger de knop:
't Booregezelschap van dit jaor:
Broêd:
Dit maegdje hieët 15 jaor gevoetbaldj beej DESM, Laor en Moesel.
Noow gieët ze gaer sporte inne sportschoeël en aaf en tów deût ze mét aan ’ne obstakelrun van Strong Viking um lekker inne modder te baddere.
Daonaeve koeëktj ze gaer, of laesj ze ’n book.
Ouch gieët ze oppe tiêd e glaeske wiên drînke met de vrölluj.
In ’t dageliks laeve wêrktj ze “helaas” in Remundj as Adviseur Audit en Control beej de gemeindje Remundj.
Ze és ’n dochter van Huub (en kleindochter van Jan) Smeets en Mary Nijsen, waat weer 'n dochter és van Frits Nijsen “de moel” en Annie Veugen.
Broêd 2023 és: Susanne van Bree - Smeets
Broêdegom:
Dieëze jóng maaktj gaer meziek en dan met name oppe gitaar.
Hae hieët in völ béndjes gespuuëldj, mer ’t langste as gitarist beej de Big Band Dial 24.
Hae és al 18 jaor betrokke beej Bospop, van prölleraper op ’t véldj wis site productie, bardeenste én op- en aafbaw van ’t evenemênt.
De léste twieë jaor hieët hae de functie van vuuërzitter vanne Stichting Bospop.
Hae wêrktj in München (Pruûse) beej de Schreiner Groep as Bedriêfs Strateeg en Business Development Manager, dét zeen deur wuuërd.
Hae és opgegruuëdj op Bosseve en Laor, en hae és ‘ne zoeën van Martin-Paul en Ira de Wit én van Cees en Will de Wit
Broêdegom 2023 és: Florian de Wit
Getuûge van de broêdegom:
Tom Reemers
Hae hultj van sporte, of det noow voetballe és beej Laor of darte, poole of biljare in zien eige kefee De Hook. Sportiviteit és belangriêker as winne.
Getuûge van de broêd:
Vivian Ingeveld-Jongen
Vivian wândeltj gaer en deut völ aan sport en yoga. 't Maaktj volop meziek beej Hermeni-j de Kompeni-j en deut vreejwilligerswêrk beej De Rogstaekers.
Vader van de broêdegom:
Mart Ramaekers
Hae waas Preens vanne V.V. de Brökwagters in 1994 en zitj dao nog altiêd inne Raod van Ellef. Wieter deut hae aan wândelvoetballe beej FC ODA en és daonaeve ouch nog clubscheidsrechter.
Moôder van de broêdegom:
Sonja Koppen-Stultjens
Sonja és 'ne vastelaovendjgek, wêrktj beej bakker Moonen op Luuëke, sportj regelmaotig en gieët gaer gezellig 'n tas koffie drînke met heur schoeënzösters
Vader van de broêd:
Lei Soudant
Treînmodelbawwe en zînge beej 'n koeër zeen zien hobby's . Hae hieët al hieël wat Preense, Adjudânte en Raod van 11-lede in 't pak gehieëse in ziene wînkel aane Maaseikerwieëg.
Moôder van de broêd:
Marlie Weerts-Kessels
Marlie hieët hieël wat hobby's: muuëbels stoffieëre, wândele, koeëke, skieë um mer 's wat te neume, en sporte deut 't ouch. Mer in dieëze gieët alle aandacht nao Geîne Pôngel, woeë 't vaanaaf 2027 lid van és.
