De veêring vanne Vastelaovendj van aafgeloupe sezoen és eigelik al begonne toen de ideeë vör de Gulden Humor zeen ontstânge. Want geluiftj ‘t of neet: sprookjes bestaon. In dit kader was dan ouch de installatie van Vorst Jasper in november in een echte “Anton Pieck”-umgaeving neet echt ’n verrassing, mer daorum neet minder schoeën.
En as d’r dan minse zeen, joonk of aod, di-j d’r van droume um oeëts Preens te waere, dan wurtj det sprookje alleîn mer schoeëner, as bliêktj, det neet alleîn pap, mer ouch de zoeën ’t és vergundj um beej de uutrooping in jannewarie, di-j staek met vaere te moge gaon drage.
En vae hebbe ’t gewieëte, want zoeëwaal ZDH Preens Paul I as ouch Jeugdpreens Kai I genoeëte van eder memênt. Ze straaldje enthousiasme uut en goeëve di-j bevloeëgeheid doeër nao edereîn, dae ouch mer e bitje vastelaovendjblood doeër de aore veultj stroume.
Van uutrooping wis optochte, ’t hieël preenselik gezelschap ging d’r doeër haer wi-j in unne tsunami en trok edereîn mej in dieëze korte, mer waal zoeë krachtige wêrvelwînd.
En as dan det onvermijdelike memênt és gekaome, det de sluuëtels mótte waere ingeleêverdj en det de aanspraektitel “Hoeëgheid” weer és verruuëldj met de gebroêkelike vuuërname Paul en Kai, dan wejje det dit indj d’r net zoeë beej huuërtj wi-j ’t begîn um ’t verhäölke complieët te make en dit sprookjesbook tow te slaon. Vastelaovendj 2023: ge woeërtj GEWÊLDJIG!
Jan Lormans, webmaster
(De foto’s in dit bericht zeen van Johan Horst.
Kliktj op ’n foto um mieër te zeen van di-j gebuuërtenis).
P.S. wildje ’t hieël sprookje van Vastelaovendj 2023 nog ‘ne kieër inzeen,
kiektj dan effe inne Fotoalbum 2023.
