Oppe 11e van de 11e hebbe Vorst Jasper van Stadsvastelaovendjvereîniging de Rogstaekers en Vorst Bert van Het Heilig Wammes ‘t Consulaat van De Rogstaekers in Maaseik geoeëpendj.
De in Maaseik woeënéchtige Rogstaeker en lid van VV de Rogstaekers, Berto Weekers és beneûmdj tot honorair consul.
Vastelaovendjveerders uut Maaseik en hieël Noeërd-Oeëst Bêls kunne zich tot d’n hieër Weekers richte beej vraoge of opmêrkinge oeëver ‘t Vastelaovendjprogramma van De Rogstaekers in Wieërt.
“D’r és ‘n groeëte verbóngeheid vanuut Wieërt met Maaseik en directe umgaeving”, aldus Vorst Jasper. “Vanuut ’t verlieëje zeen tal van Wieërter optochtdaelnemers de grens oeëver getrókke um heur creaties inne Hâlfvaste Stoet te toeëne en dao dikke knake te buuëre.” Vorst Bert beaamtj dét en völtj aan: “Vae mótte ouch de lange stoet economische vluchtelinge neet vergaete! D’r zeen al talloze Wieërtenare gewaesj di-j de Wieërter vlaai hebbe ingeruuëldj vör de Maaseiker knapkoôk.”
Dieës minse kunne zich, wannieër dét nog neet gebuuërdj és, asnog beej ‘t Consulaat inschriêve as “Ich bin ‘ne Rogstaeker®”. Vör de beschei-je beejdraag van € 11 per jaor ontvânge ze ‘ne schoeëne pin, as ieërste ‘t léste Rogstaekersnoets en Vastelaovendjgezét ‘De Rogstèker’ thoês bezörgdj.
Ângersum kunne ouch Wieërtenare zich tot de honorair consul richte vör contacte en informatie oeëver daelname aane ‘Internationale Hawfvaste Stoet’ van Maaseik. De intentie vanne honorair consul és um ‘n project op puuëj te kriêge woeë optochtdaelnemers di-j zoeëwaal aane ‘Groeëte Rogstaekersoptocht’ as de ‘Internationale Hawfvaste Stoet’ mejdoon, (financieel) óngerstuuëndj waere.
“Vae zeen nog in aafwachting van ‘n belángriêk extern besloêt heejoeëver en zulle de optochtdaelnemers daovan zieëker oppe huuëgdje haoje,” kân honorair consul Berto Weekers dao op dit memênt oeëver kwiêt.
‘t Consulaat és te bereike via consulaat@vvderogstaekers.nl en op gezatte tiêde zâl de honorair consul spraekoor haoje beej Café Graad, Pelserstraot 7 in Maaseik. Naeve ‘n pötje beer kujjae de hieër Weekers traktieëre op al eur vraoge, mer zieëker ouch op ‘n gooj bak (schuuns moog, mer dan waal nao acht oor saoves).
De oeëpening van ‘t Consulaat véltj same met ‘t 9×11-jaorig jubileumsezoen van Stadsvastelaovendjvereînigjng de Rogstaekers, dét op zaoterdig 16 november aanstaondje fieëstelik geoeëpendj zâl waere inne Wieërter binnestad.
Zoeëwaal Vorst Jasper as Vorst Bert zeen zieër verguldj met dieëze groeëte stap inne verbóngeheid tusse beide stieëje en beide Limburge. Ervaringe en kinnes zulle uutgewisseldj waere um de kwaliteit van beide optochte wis in lingdje van dage te borge.
“Dao drînke vae d’r eine op,” aldus ‘ne uutgelaote honorair consul.
