Op zaoterdig 30 november woeërt Marie-Louise van den Bosch doeër Vorst Jasper verrásj met de tówkinning vanne Orde van ‘t Kammeräödje.
De Orde van ‘t Kammeräödje
't Kammeräödje és ‘n speciaal óngerschei-jing van Stadsvastelaovendjvereîniging de Rogstaekers di-j hoeëguut eine kieër per jaor wurtj uutgereiktj aan ‘ne persoeën of groep dae zich op ‘n bezûndjer meneer en vörâl op de achtergrónd verdeênstelik hieët gemaaktj vör de Wieërter vastelaovendj in ‘t algemein en De Rogstaekers in ‘t bezûndjer. De orde woeërt in 1992 vör de ieërste kieër uutgereiktj.
Verdeênste Marie-Louise
De ieërste betrókkeheid van Marie-Louise beej de Rogstaekersvereîniging ontstóng in 2005, wi-j eure zoeën Ruben as Jeugdpreens van Wieërt de ‘wichtervastelaovendj’ vuuër mocht gaon. In 2009 woeërt echtgenoeët Dorus lid van de Rogstaekersvereîniging. Tiêdes dit lidmaatschap és Marie-Louise altiêd êrg betrókke gewaesj beej ’t wulzeen vanne vereîniging. Vanaaf 2015 verzörgtj ’t de kleî-jer vanne Jeugdpreens en de Jeugdraod van Ellef. Daobeej és ’t verântwoeërdelik vör ’t vermake van de kleî-jer en kleîn reparaties, zoeëdet de jeugd good vör de daag keumtj en d’r netjes beej luiptj. En det és tiêdes e sezoen ’n hieël opgaaf. Daonaeve és Marie-Louise vanzelfspraekendj ouch ‘ne enthousiaste vastelaovendjveerder en ’n vaste bezeukster van alle activiteite.
Uutreiking óngerschei-jing
Met recht és Marie-Louise van den Bosch e ‘Kammeräödje’ van De Rogstaekers te neume. De uutreiking van dieës óngerschei-jing zâl plaatsvînge tiêdes de Boonte Aovendj van donderdig 30 jannewarie in ‘t Munttheater in Wieërt.
