Tiêdes ’n fieëstelike sirremonie in ’t stadhoês van Aoke ontving Wieërt zaoterdig 23 november officieel de titel “Europese cultuur- en carnavalsstad 2025”. Dieës bezûndjer erkinning woeërt tówgekindj doeër de Närrische Europäische Gemeinschaft (NEG) en ieërder cultuurstieëj. De delegatie uut Wieërt, ónger aanveuring van Stadsvastelaovendjvereîniging De Rogstaekers, noeëm de óngerscheî-jing mét enthousiasme in ontvângst.
’t Gezicht van Wieërter vastelaovendjtradities
De Rogstaekers zeen ’n belangriêk óngerdael vanne Wieërter cultuur. Eur kluuërriêke optochte en ieuwe-aoj tradities trékke jaorliks völ bezeukers. De naam, geïnspirieërdj op ’n aoj legende oeëver ‘ne rog, stieët symbool vör humor en laevesvreugdje. Same mét ânger vereîniginge in de gemeindje Wieërt verstêrke ze de carnavaleske identiteit van Wieërt en bawwe ze brögke nao Europese vastelaovendj-gemeinschappe.
Verbînging en gruuëtsheid tiêdes de sirremonie
De sirremonie in Aoke kindje völ hoeëgtepûnte. Börgemeister Sibylle Keupen kaldje gruuëts oeëver heur stad as gastlocatie vör dit unieke verbônd. Volges Frank Prömpeler, vuuërzitter van de
Närrisch-Europäische Kulturstädte, lutj de tówkinning zeen wi-j belangriêk samewêrking en culturele tradities zeen vör Europa.
Sabine Verheyen, vicevuuërzitter van ’t Europees Parlemênt, lagt in heure tówspraak de naodrök op ’t verbîngendje karakter van vastelaovendj: “Vastelaovendj bringtj minse same en slutj brögke oeëver grenze haer. Dit gedaeldje erfgood és van onschatbaar waerde vör Europa.”
Optrei-je ‘Antje van de Statie’
Tiêdes de sirremonie zörgdje zangeres Linda Smeets, bekindj uut de musical Antje van de Statie, vör e bezûndjer muzikaal intermezzo. ’t Optrei-je goof de beejeînkomst ’n extra fieëstelik tîntje. Antje, ’n historisch figuur det verbônge és met Wieërt, stieët symbool vör vaerkracht en hértelikheid. Neteurlik woeërt in Aoke ouch kinnis gemaaktj mét de Wieërter vlaai, woeëmej Antje verbônge és.
2025: Wieërt schittertj in Europa
De sirremonie kwoeëm tot ’n hoeëgtepûnt wi-j börgemeister Raymond Vlecken en De Rogstaekers de oorkonde in ontvangst noeëme. Vlecken neumdje de titel ’n groeëte ieër en benaodrökdje de gruuëtsigheid van Wieërt op eur riêke tradities. De Rogstaekers nuuëdje de Närrische Europäische Gemeinschaft medeîn uut om Wieërt in 2025 te bezeuke.
Mét de titel “Europese cultuur- en carnavalsstad 2025” stieët Wieërt volgendj jaor volop inne belangstelling. De stad hieët e gevarieërdj programma uutgedachtj mét ontmoetinge. Heejvör és ouch é subsidieregeling vör activiteite opgezátte. Dit allemaol mét as doel um ’t êrfgood van vastelaovendj en cultuur te veêre en tradities binne Europa te verstêrke.
Bron: Weert de Gekste
Foto’s: Johan Horst
