Rogstaekers Jeugdpreens

Op dieës pagina kujje volge, waat de Jeugdpreens allemaol mejmaaktj vanaaf ’t momênt van uutrope tot aan zien abdicatie op Vastelaovendjdieënsdig.


 

Jeugdpreens Sjoerd I

In ’n gepasj gevöldj Theater de Huiskamer és op vriêdig 18 fibberwarie 2022 de 12-jaorige Sjoerd Roelofsen uutgeroôpe tot de 70e Jeugdpreens van Wieërt. Noow d’r nao ’n jaor zónger vastelaovendj mieër ruuëmdje és vör vastelaovendj zâl Jeugdpreens Sjoerd I as eînige Rogstaekerspreens de bezûndjere vastelaovendj van 2022 vuuër gaon.

Hosse, sprînge en kaake, dét és Jeugdpreens Sjoerd I al van joonks aaf aan gelieërdj. Wi-j hae pas 1 jaor aod woor, deej hae al mej aan de Wichteroptocht. Met V.V. Klein Grut hieët hae al hieël wat kieëre met prachtige creaties doeër de binnestad van Wieërt getrókke, woeëbeej ze zelfs ‘ne kieër de “Zilvere Knoeëk” gewonne hebbe.
Vastelaovendj zitj ‘m in ’t blood, dét kân ouch neet ângers met ‘ne pap dae zelf in 1987 Jeugdpreens van Wieërt woor en ’n mam di-j vreûger dânzje beej de Huppelpupkes.

Oeëze kleine Hoeëgheid és ‘ne zoeën van Roel Roelofsen en Rian Ramaekers. Same met zien groeëte zus Lonneke van 14 jaor és hae opgegrúdj op ’t Heerspad op Laor, noow woeëntj hae alweer ’n paar jaor met völ plezeer op Laorvêldj aan ’t Knoopkruid.

Doeërdewaeks és de kleine Rogstaekerspreens dék te vînge op OBS Molenakker, woeë hae prebieërtj um juf Kitty van groep 8 wat wiêzer te make. De schoeël ligktj neet wiêt van de plaats woeë Sjoerd I ’t leêfste és: ’t voetbalterrein van SV Laor. Hae spuuëltj dao in ’t team Jónges Ónger 13-1.
Dét oeëze Jeugdpreens sportief óngerlagdj és, bliêktj waal uut ’t feit det hae ouch eder jaor hieël gaer gieët skieë. Éder jaor mette Körsmes, want skieë met vastelaovendj… dét kân écht neet!

Umdét Jeugdpreens Sjoerd I zoeë van fieëste hultj, hieët hae de Orde van ’t Fieëstmenke ingestéldj.

Jeugdpreens Sjoerd I gieët dieëze bezûndjere vastelaovendj in, same met de Jeugdraod van Elf, de Huppelpupkes en neteurlik hieët hae zien állerbêste kammeräöj beneûmdj tot adjudânte.

Mats Smolenaers, Sebas Hengeveld en Sem Tulfer zulle Jeugdpreens Sjoerd I beejstaon in ‘ne bezûndjere vastelaovendj, dae ze vuuër zulle gaon ónger ’t devies:

HOSSE, SPRÎNGE, KAAKE, VAE GAON D’R EIN GROEËT FIEËST VAN MAKE!

De uutrooping van Jeugdpreens Sjoerd I op vrieêdig 18 fibberwarie és toen neet allein live uutgezonde, mer ouch digitaal vastgelagdj. Di-j registratie kujje heej zeen.

Van lînks nao rechts: Sem Tulfer, Jeugdpreens Sjoerd I Roelofsen, Mats Smolenaers, Sebas Hengeveld
Van lînks nao rechts: pap Roel, Jeugdpreens Sjoerd I, zus Lonneke en mam Rian
De Orde van ’t Fieëstmenke

Foto’s: Loes Mennen | Flitzer Fotografie


Foto’s vanne uutrooping op vriêdig 18 fibberwarie staon in ’t album
(Foto’s: Johan Horst)


 

Normaal gesproeëke waere de Groeëte Preens en de Jeugdpreens van de Rogstaekers uutgebrèdj aan uch vuuërgestéldj in vastelaovendjgezét De Rogstèker, Mer ouch det és dit jaor ângers. De gezét és al op 12 fibberwarie uutgekaome, want dao zitte allerli-j termiêne aan vast, mér Jeugdpreens Sjoerd I és pas op vriêdig 18 fibberwarie uutgeroope. Daorum ’s d’r speciaal vör Sjoerd en vör ânger geïnteressieërdje ’n minigezétje gemaaktj: ’t Rogstèkerke.

’t Ieërste exemplaar és vanzelfspraekendj uutgereiktj aan oeëze körsvörse Jeugdpreens, mer és in bepêrkdje oplaag ouch verkriêgbaar beej WarenHuis conceptstore inne Bieëkstraot, Schoonmakeri-j Grosfeld inne Langstraot, De Bruna oppe Mêrrentj en Cigo Van Bun in De Mûnt.

Kujje neet wachte, dan hejje gelök want via dieëze knop és ’t Rogstèkerke ouch digitaal te laeze.

 

Sjoerd I ontvîngtj ’t ieërste exemplaar van ’t Rogstèkerke
De schoon van Sjoerd I waere gewieksj doeër Pascal Grosfeld
Ouch beej Cigo Van Bun waerdje ‘ne stapel gezétjes aafgeleverdj

 

Naodet de Jeugdpreens met adjedânte en gevolg exemplare van ’t Rogstèkerke haaje roondgebrachtj, woeërt ’t gezelschap doeër beiaardier Frank Steijns uutgenuuëdigdj um same met hem de trappe van de Martinustoeëre te beklumme. Zoeë kos ederein aanwieëzig zeen beej ’t concert van Wieërter vastelaovendjlidjes, di-j Frank dao spuuëldje op ’t carillon. En neteurlik hejje van boeëvenuut ’n prachtig uutzicht oeëver Wieërt.



Mieër foto’s van dit
concert staon in ’t


 

Op zoondig 20 fibberwarie 2022 kriêg Sjoerd I de sluuëtel van ’t stadsachterpörtje uutgereiktj doeër börgemeister Raymond Vlecken. Det gebuuërdje oppe trappe van ’t aod stadhoês oppe Mêrrentj. Aansloêtendj mocht oeëze Jeugdpreens nog hieël wat hendjes schödde! 


Nao de sluuëteloeëverdracht en ’t vuuërlaeze van de proclamatie doeër de adjedânte ging Jeugdpreens Sjoerd I same met börgemeister Vlecken nao boeëve vör de balkonscène. Want ouch det huuërt beej zoeë ’n belangriêke gebuuërtenis.  Âmpassant woeërt de Wiërter Rog aan ’t bordes opgehânge as teîken van de waardigheid van oeëze Jeugdpreens.

“En ich heb uch nog zoeë gezagdj: maaktj eur klei-jer neet voêl.” – “Jao, mam….”

 

Op zaoterdig 26 fibberwarie zeen alle wichter van Wieërt van hérte welkom op de jaorlikse Wichterfieëstmiddig in Kefee de Brouwer oppe Oelemêrrentj.

Tösse 14:00 en 17:00 oor és de dânsvloer vör de jeugd. En det allemaol ónger het devies van Jeugdpreens Sjoerd I:
Hosse, sprînge, kaake,
vae gaon d’r ein groeët fieëst van make!

Update 26-02-2022:
En neteurlik waerdje d’r gehosj, gesprônge en gekaaktj.

’t Waas ein groeët fieëst, en neet allein vör de wichter, mer vör ederein, dae d’r mer zin in haaj.

Óngertösse kós de Wieërter binnestad geneête van ’n vastelaovendjconcert vanuut de Martinustoeëre. Terwiêl beiaardier Frank Steijns ’t carillon rânseldje en Ronald Moeëne röstig de toetse beroerdje, zônge zien Carien en ouch Stefan Wolter d’r fleenk op los. De vlag ging in top vör de vastelaovendj 2022. Neet de vastelaovendj dae vae vuur auge haaje, mer waal ‘ne vastelaovendj um in te liêste. ??


 

Update 28-02-2022:

Nao twieë jaor waas d’r weer ’s ‘ne Wichteroptocht in de Wieërter binnestad. En ge kosj ’t mêrke: ederein genoeët en waas bli-j. En det ’t zönke uch oeëverhoup schieën: in ein woeërd zalig!


Bekiektj de foto’s in de albums mer!


 

En nao 11 daag waas ’t op 1 mieërt toch echt zoeë wiêt. Aan alles keumtj ’n indj, ouch aan dit bezûndjere jaor, woeë-in alleîn Jeugdpreens Sjoerd I ’t vör ’t zégke haaj. Nao de noeëdige plichtpleginge, ’t inleevere van de sluuëtel, de vaere en de preensemedalie, waas ’t toch echt gedaon en kós Sjoerd Roelofsen, same met pap en
aod-Jeugdpreens Roel in de hoeëgwêrker stappe en ónger ’t lowwe vanne kêrkklokke in de dónkere aovendj verdwiêne.