Ich bin ‘ne Rogstaeker®

‘t Uutspraeke alleîn al hieët iets van stelligheid in zich…… 
‘ne Rogstaeker® es d’r gruuëts op dette zich zoeë neumtj. Hae hieët ‘t vastelaovendjhert oppe gooj plaats en dreugtj beej aanne instândhaojing vanne vastelaovendjcultuur. Hae dreugtj ‘t zelfs e bitje uut doeër ‘t unieke speldje!

Waat hultj Rogstaeker® zeen in?

  • ‘ne Rogstaeker® kriegtj eeder jaor ´t speldje det hae of zeuj gruuëts kân drage
  • ‘ne Rogstaeker® kriegtj minimaal 2x per jaor mét de RogMail ´t aktiviteite- en vereînigingsnoets uut ieërste hând
  • ‘ne Rogstaeker® kriegtj de vastelaovendjgezèt en ’t optochtprogram op naam thoêsbezörrigdj, ouch as dejje ‘n sticker oppe breevebös hetj mét “geen ongeadresseerd reclamedrukwerk”
  • ‘ne Rogstaeker® kân (vuuër)rizzervieëre vör de volgendje aktiviteite (en vôl es vôl):
    – Boonte Aovendj 
    – Boonte Femîliemiddig
  • ‘ne Rogstaeker® kriegtj 11 % korting
    – op ’n towgangskaartje vör ’t Rogstaekers Matinee
    – beej aankoup van alle artikele uut de webwînkel. Letj op: de Knuffelrog és exclusief vör ingeschrieëve Rogstaekers® verkriêgbaar
  • ‘ne Rogstaeker® hieët kâns op ‘ne meet & greet met de Preens

Inschriêve kosj € 11,00 per jaor.

Ouch wichter kinne Rogstaeker® waere

Wichter van 0 t/m 11 jaor kunne ingeschrieëve waere doeër eur aojers of ‘ne ângere volwassene.

  • Rogstaekers® wichter kriêge eeder jaor ’t speldje det ze gruuëts kunne drage
  • Rogstaekers® wichter kunne (vuuër)rizzervieëre vör de Boonte Femiêliemiddig (vôl es vôl). Dit kân alleîn oonger begeleiding van minimaal eine volwassene
  • Rogstaekers® wichter hebbe kâns op ‘ne meet & greet met de Jeugdpreens

Inschriêve kosj € 1,00 per laevesjaor (de laeftiêd op datum van inschriêving és bepaolendj).
In zien ieërste laevesjaor és ’t wècht dus gratis lid.

 

Wi-j waerdje Rogstaeker®

Hieël gemekkelik: doeër dit formeleer in te völle!

Mer gae kintj ouch emus ângers (groeët of kleîn) Rogstaeker® laote waere.
Dao mojje dit formeleer vör gebroêke.

Nao ’t invölle van ’t formeleer kriegdje ’n gepersonalisieërdj mailtje met volgnummer tówgesteurdj. Heejmej kujje dan ’t speldje aafhale beej WarenHuis conceptstore in de Bieëkstraot (Cwartier).

Historie

Henk Jacobs, destiêds lid van de Rogstaekersvereîniging en d’r nog altiêd as vreejwilliger aan verbônge, waas de groeëte animator vör de actie “Ich bin ‘ne Rogstaeker®”, waat de létste jaore és uutgegrujdj tot ’n succesriêk óngerdael van de hieële organisatie. Oeëver zien movitatie heejvör, zieët Henk:

“In 2016 és ’t concept vör Ich bin ‘ne Rogstaeker® ontstânge. Doeër allerlei-j maatschappelike ontwikkelinge és ’t aantal vastelaovendjveerders de lèste 30 jaor behuuërlik trökgeloûpe. ’t Idee és um minse di-j al vastelaovendjveerder zeen dochter beej de Rogstaekersvereîniging te betrekke um ze op dieës meneer vör dit belangriêk stök cultuur te behaoje. Dieës zelfdje minse vertelle ânger minse oeëver de Rogstaekersvastelaovendj en hoeëpe eur zoeë te enthousiasmieëre.”

Pinke

Info

Ontwêrp

2024: Els Maes-Verdonschot

Dits kieër és ’t ontwêrp van Els Maes-Verdonschot, kunstenares, verbônge aan RICK en eder jaor actief daelnemer aane Koldergaleri-j. Els hieët ’t pinke ’t thema “Same” mejgegaeve en det zoeë umschrieëve:

Vasteloavendj is veur jonk en aod, Same lekker ff alles vergaete en fieëste mit z’n alle.
Sjoeën kleurige, gekke en vrolijke creaties bedînke
en dees Same tot get hieël sjoeëns opbawwe!
En dan… gezellig Same mit doon mit de boontje stoet!
De optocht és de klapper, en daonao lekker Same op stap om dit alles Same te veere

 

2023: Patrick Smeets

Al gaw kwaome vör ’t ontwêrp twieë zake beej mich nao boeëve di-j ich inne vastelaovendjveering belangriêk ving. Vastelaovendj veerdje vanuut eur hert (en zeel) en same. Vanuut ’t hert vanwieëge mien betrokkeheid van jongs aaf aan. En same és neet alleîn met vrînde, mer met edereîn daeje met de vastelaovendjdaag tieëge kotj. Dieës twieë aspecte zeen good te zeen in ’t goudkluuërig hert en de hendjes di-j twieë figure om mekaar haer slaon.

 

2022: Nelleke Bongers

2021 stong in ’t teîken van sprookjes (ouch vanwieëge de Gulden Humor). Det deej mich dînke aane Efteling en met name ’t plein met de heraute. Di-j heraute staon dao um ’t verhaal, ’t sprookje aan te kondige. En ze hebbe allemaol zoeë ’ne toeter vast met zoeë ’n vaandel d’raan en det és mien inspiratie gewaesj um ’t speldje vör 2022 te make.

 

2021: Nelleke Bongers

As ich dînk aan de uutspraok ‘Ich bin ‘ne Rogstaeker’, dan dînk ich aan alle schoeën uutgedozje dames en hieëre met vastelaovendj. Ederein deût z’n bêst um de gekste en schoeënste creaties uut de kast te hale. De inspiratie vör ’t pinke keumtj dan ouch voeërt uut al dieës vastelaovendjgezichte. Ich heb dit gecombinieërdj met ’t stadswaope van oeës eige Wieërt en zoeë bin ich tot ’t ontwêrp van dit pinke gekaome. Ich hoeëp dejje d’r wat van eur eige in herkintj en det eur leefdje vör de vastelaovendj ouch dit jaor wieër ‘n bitje wurtj aangewakkerdj!

 

2020: Linda Jacobs

Ich heb in dit jaor gekoeëze vör ’n kluuërecombinatie en ‘ne vorm dae geïnspirieërdj és op ’t stadswaopen van Wieërt met ‘ne artistieke inslaag. De ‘V’ van vastelaovendj springtj d’r uut same met ‘ne rog dae doeër de geometrische vôrme zwumtj. De drejhook met spitse vorm deut dînke aan ‘ne tandige gaffel.

 

2019: Nicky Fischer

‘ne Rogstaeker stieët vör ‘ne Wieërtenaar, want Rogstaekers det zeen vae allemaol. Daorum stieët centraal in ’t ontwêrp ’t bekîndjste bieëldmêrk van Wieërt: de Sint Martinustoeëre, gelaege in ’t hert vanne Wieërter binnestad. Roontelum zeejjae de contouren vanne singels. Vastelaovendj és ’t fieëst met ‘ne lach en ’n traon. Det wurtj gesymbolisieërdj met de twieë maskers. Op dieës meneer keumptj de symboliek van vastelaovendj én van Wieërt same in dit speldje.

 

2018: Stef Mooren

In 2017 ‘ne nowwe vorst en ’n now website. Hoeëg tiêd vör ’n now logo. De basis és ’t traditionele ‘Köpke’, waat al jaore lang symbool stieët vör de Wieërter Rogstaekersvastelaovendj. Daonaeve gaon de Rogstaekers trök nao de basis, namelik nao de kluuëre blaw en wit, van aodsher de hoêskluuëre van de vereîniging. ’t Köpke és vörzeen van een aantal now elemênte, zoals ‘ne schoeëne kraag, fieëstelike confetti en ‘ne gouwe rog. Waat ouch now és, és de towveuging van ’t waopenschîldj vanne stad Wieërt, waat de Rogstaekers as stadsvastelaovendjvereîniging gruuëts uut wille drage. Dit nowwe logo hieët model gestânge vör ’t pinke van 2018.

2017: Jan van Riet

Jan waas ein van de dekorbawwers beej de Boonte Aovendje, mét name schilder. Hae bawdje ouch mej aan de Raod van Elf wage en waas de maker van ‘t imposânte broene Rogstaekersbiêldj. Daovör waerdje hem in 1997 de Orde van ’t Kammeräödje towgekindj. In 2017 mocht hae ’t ieërste pinke van ’n hoeëpelik lange serie ontwêrpe.