't lidje "De Mêrrentj" van Ed Stroek és 'n echt fieëstnummer, mer ás 't Vastelaovendjdieënsdig és en Ed dit zingtj beej de abdicaties van oeës Preense, dan wurtj de laaj-ing van de strofe "En eîns per jaor luiptj heej de Preens..." hieël ângers. 't Roggebieëst, symbool van de Wieërter Vastelaovendj, kriegt e paar minute de tiêd um te verângere in as en dan és 't onvermijdelike aafscheid aangebroeëke vör oeës Preense en in dit gevâl twieë kanjers Ruud I en Wes I, di-j effe later weer eur ieëreteîkene sluuëtel, staek mét vaere en ketting al dan neet van hérte hebbe mótte inleêvere. Dan staon dao weer Ruud Teunissen en Wes van Goor. En dan zeeje de zakdukskes, woeë e paar minute ieërder nog volop mej és gezwéjd, nao de augheuk gaon um dao de noeëdige träönkes wégk te vriêve. De klokke in dae schoeëne kêrktoeëre beginne te lówwe, uut de luidspraekers schaltj "Ut és vörbeej" en twieë now vreende vör 't laeve stappe inne ladderwage um nog eine kieër op 30 maeter huuëgdje nao al die vastelaovendjveerders te kunne zwejje. Inderdaad: 't és vörbeej. (foto's: Johan Horst)
92 Foto's
De wichteroptocht haaj 't waer mej en det lokdje hieël wat minse nao de binnestad van Wieërt. En daodoeër koste zeuj geneête van 'n kluuërriêke optocht met völ humor en lôl. Neteurlik was de publieke belangstelling ouch 'ne opstaeker vör de daelnemers um alles uut de kast te hale. De schoeënste kop haaj Aivi van Gansewinkel, det mét "Vastelaovendj gaaitj mich waal" de kleine Gouwe Rog won. De Zûlvere Knoeëk ging nao de femiêlie Wehrens mét "Kiek oet! Vae hebbe 't Smileyvirus". 't Motto "Vae zitte in de put" leêverdje de Broonze Bakfiets op. (foto's: Frank Camp)
50 Foto's
Tiêdes de Rogstaekersoptocht op zoondig 11 fibberwarie ware völ creaties te bewôngere, woeëbeej spitsvondige ideeë woeërte aafgewisseldj mét humorvolle uutveuringe. De daelnemendje groepe wiste wi-j dan ouch eur enthousiasme oeëver te brînge op 't talriêke publiek. De Gouwe Rog woeërt gewonne door Ni Normaal, de Knouwelpriês koeëm vör de dêrdje achtereînvolgendje kieër terecht beej de Straotvêrkus en de Hei-j Up Priês woeërt 'n terechte proeëj vör de VV Kakelkoeëj. (foto's: Frank Camp)
94 Foto's
Eder jaor wurtj 't van oeërsprong christelike elemênt van de vastelaovendj neet vergaete en woeëne de Rogstaekers 'n speciaal samegesteldje Heilige Més beej inne St. Martinuskêrk. (foto's: Johan Horst)
29 Foto's
'n College van B&W det vandaag neet vakkundig, mer bakkundig blieëk te zeen, 'n echte drag queen mét leefdje vör vlaaj, 'ne jeugdpreens, dae 't College op zien nummer zat en 'ne stadspreens, dae wat klueër bracht in oeës stadsbesteur. Det waas 't verluip van de Sluuëteloeëverdracht in 't kort. Humor mét 'n sneer, zoeë wi-j det huuërtj. En gelökkig woeëre dao völ minse getuûge van, woeë-ónger fotograaf Johan Horst. Daonao woeërt oppe Mêrrentj de Rog opgehânge en kóste oeës Preense boeëve in de kêrktoeëre 'n beiaardconcert van Frank Steijns beejwoeëne.
93 Foto's
Oppe vriêdig woeërt as opwêrmer vör di-j schoeën daag 'n Aod-Preensetreffe gehaoje oppe Mêrrentj. Daobeej koste de aanwieëzige inne tênt kieke en loêstere nao optraejes van Mark Gruythuysen, Moerepetazie (met twieë aod-preense in hun midde) en nao Harry en Joerik. (foto's: Johan Horst)
121 Foto's
Neteurlik és beej 'ne Vastelaovendj Matinee de meziek 't belangriêkste ongerdael. Dao zörgde Huib Hölzken met accordeon, Stefan Wolter en Ronald en Carien vör. En behâlve de polonaise was d'r vanzelfspraekendj ouch 'n dânsoptraeje van de Huppelpupkes. De vuuërig jaor tot Moerepetaazie 2.0 gebombardieërdje Nout en Phil lieëte zich ouch nog effe gelde en De Aldenborgh bracht 't Wieërter verlieëje tot laeve. Al met âl 'ne gezellige middig d'ruut met 'n drênkske en 'n hèpke. (foto's Johan Horst)
65 Foto's
't Optochtbâl op zaoterdig 3 fibberwarie 2024 waas 'n aaneînschakeling van meziek, lôl, meziek, kwauwel, meziek, priêze en meziek. De Kauvers, di-j teîkendje vör 't naeveprogramma, haaje gezörgdj vör 'n loeëteri-j mét vette priêze. De Badmötse en later Erwin brachte met eure aanstaekelike meziek de stumming d'r oppe tiêd in en wi-j op 't îndj Hoondervel in de startblokke verschieën, ging't daak van 't Franciscushoês d'r bekans aaf. De indrökke, di-j Johan Horst opdieëj, zégke genog.
98 Foto's
D'r woeërt hieel wat gefieeësj en gedânsj oppe Wichterfieëstmiddig. Dao ware de dânsgroep van adjudântje (en zösterke van de Jeugdpreens) Saar en de Huppelpupkes, mer ouch beej de delegatie van de Jeugd van D'n Uul uut Remundj bliêve de beînkes neet stilstaon. De artieste van de Boonte Femiêliemiddig dieëje dao nog e schöpke boeëvenop en vroeëge al dânsendj aan de aanwieëzige: "Veuldjae ut ouch?" Mega Myrthe en Super Rob ware ouch presênt, zjuust wi-j de winnaars van de Broonze Bakfiets en Zulvere Knoeëk, di-j eure gewonne wisselpriês van aafgeloupe jaor koeëme inruuële vör 'n bliêvendje herinnering. (foto's: Johan Horst)
78 Foto's
't Jaorlikse Boorebâl begintj ouch vör 't broêloftsgezelschap met 't légke van 'ne gooje boeëm. En neteurlik zeen zoeëwaal de getuûgen as de aojers hieël nowsgierig, weem de twieë hoeëfdpersoeëne van dit huwelik vör eîne aovendj zeen, zjuust wi-j 't echtpaar zelf. Dit jaor stónge Iris van Gemert en Luc Aspers in 't middelpûnt van dit fieëst. Johan Horst waas d'r van begîn tot îndj beej en lutj uch mejgeneête van de memênte, woeë de broêloftsgaste neet beej kóste zeen.
107 Foto's
Neet alleîn de wichter inne zaal genoeëte van de leuke sketches van de BFM-artieste, mer ouch de collega's van de Boonte Aovendje ware vôl lof oeëver de actieërprestaties. Peggy Figaroa waas met de camera aanwieëzig um dit vast te légke.
24 Foto's
De Boonte Aovendje zeen 'n breît scala aan kluuëre, knouwel en kolder van 'n groeët aantal typetjes. In dieës fotogalleri-j vingdje det allemaol trök. Neet op tiêdsvolgorde, mer gewoeën lekker doeër mekaar, zoeëdejje uch later nog 's kuntj aafvraoge, wi-j det ouch weer ging en aaflieëp. (foto's: Johan Horst)
55 Foto's
Tiêdes de daag, det de mieëste aandacht uutgieët nao detgieëne, waat zich aafspuuëltj op de bühne van 't Munttheater, vèltj d'r ouch van alles te zeen en belaeve in de wândelgânge van 't theater. As dejje dao teminste aug vör hètj, mer det és Johan Horst wul tówvertrawdj. 'n Bitje van alles wat!
28 Foto's
De SLV bracht twieë ongerscheidinge mej beej eur bezeuk aan de Boonte Aovendj op maondjig 15 jannewarie 2024. De Orde van Verdienste waas vör Arie Verheijen en de Dorstvlieëgels ontvinge de Zilveren Buut (foto's: Johan Horst)
28 Foto's
Tiêdes de Boonte Aovendj van zoondig 14 jannewarie 2024 steldje Preens Ruud zien adjudânte Marc Beelen, Frank Driessen en Roy Truijen en de oeëverige lede van 't preenselik gezelschap vuuër aane zaal en aan fotograaf Johan Horst.
18 Foto's
Aan 't indj vanne Boonte Femiêlie Middig op zoondig 14 jannewarie 2024 woeërt Wes van Goor uutgerope as 72e Jeugdpreens van Wieërt. Nao zien installatie steldje de körsvörse Jeugdpreens Wes I zien femiêlie en zien adjudantjes twieëlingzöster Saar, Mila Geraedts en Teun Strijbos vuuër aan 't enthousiaste pebliek inne zaal. Fotograaf Johan Horst waas d'rbeej.
30 Foto's
De groeëtste aandacht beej de Gala Boonte Aovendj ging neteurlik uut nao de uutrooping van de 78e Stadspreens van Wieërt. Det bliêk Ruud Teunissen te zeen. Johan Horst lagt dieës belangriêke memênte vör Preens Ruud I vast.
26 Foto's
Johan Horst maakdje 'n impressie van de gaste vuuër 't begîn van de Gala Boonte Aovendj
27 Foto's
'n Impressie van de Sezoensoeëpening 2023-2024 van de Rogstaekers doeër 't aug van Johan Horst
37 Foto's
