Kieëtele Dieënsdig

21 FIBBERWARIE
14:00
Wieërter binnestad

 
 
 
 

Kieëtele Dieënsdig begintj oeëver:

Roôptj de Pestoeër, de Börgemeister en de Schout: NOOW ÉS D’N DUÛVEL LOS!!!

Boôre, börgers en boetelúj,
Kótj op vastelaovendjdieënsdig nao de binnestad.
Hawtj de trom en maaktj leweît met toeters, panne en kieëtels um ‘t Duûvels bieëst, d’n aoje Rog van Wieërt, te verjaage uut oeës stédje.
Same met álle vastelaovendjveerders van Wieërt zulle de “Kieëtellappers” laote zeen det vae Wieërtenare vör d’n duûvel neet bang zeen.
En as dan dae duûvel uut Wieërt verjaagdj és zulle vae ’t allemaol beseffe: Met vastelaovendj regieërtj ’t vôlk, dan oeëverhieërsj de knouwel en de schaele zeîver, dán belaeve vae de vastelaovendj uut oeës hért!

Leêf Rogstaekerinnekes en Rogstaekers, Vae prizzentieëre uch:

Kieëtele dieënsdig!

Waat és Kieëtele dieënsdig?

Op Kieëtele dieënsdig gaon vae de vastelaovendj wieër belaeve en veere op de meneer zoeëwi-j dét ’t eigelik bedoeldj és. Dan zâl de vastelaovendj wieër uut eur éige hért kaome en dan zâl d’r gein kuuër aan artieste zeen di-j uch ammezieëre, mer dan gaojjae uch zéllef wieër ammezieëre.
Vae gaon de straote en de pleine op woeëbeej de Wieërter tapperi-jje stök vör stök aangedaon kunne waere.

Doeër de binnestad zulle de “Kieëtellappers” roôndtrékke met ‘ne groeëte, angstaanjagendje Rog. Met ‘ne knipoug nao ’t vreûgere “Toêt- en Blaosfieëst” roôpe vae uch op um met alles waat meziek en herrie maaktj achter dét Duûvels bieëst aan te trékke.
Óngerwieëges zulle vae de kepélle van “Hermeniekes on Toer” treffe en oppe Mêrrentj zâl ruuëmdje zeen vör de knouwelgezelschappe um zich te prizzentieëre met heur straottheater en uch te confrontieëre met flawwekûl en schaele zeiver.
Vör de rest zâl ‘t ’n spontaan treffe zeen van minse di-j plezeer make en hebbe. Heerlik um aan mej te doon, gewêldjig um nao te kieke: ‘ne complieëte (on)georganisieërdje chaos met ammezemênt vör jônk en aod!

De groeëte apotheose van dit festijn zâl plaatsvînge wannieër de middig plaats maaktj vör d’n aovendj. Oppe aoje Mêrrentj zulle álle Wieërter vastelaovendjveerders samekaome en smêlte bliêdschap, emotie, schaele zeîver en meziek same tot de groeëtste positieve chaos dae vae in jáore gezeen hebbe.
Dán és de macht nog efkes aan ’t vôlk, dán zulle de Rogstaekerspreense nog regieëre en dán zulle vae de vastelaovendj belaeve!

Wannieër ésj te doon?

Op dieënsdig 21-02-2023 roôntelum 14:11 oor vertréktj de georganisieërdje chaos inne ‘ne stoet hossendj en sprîngendj met de Aoje Rog van Wieërt doeër de binnestad.

Vae nuuëje uch van hérte uut um same met de “Kieëtellappers” van 2023 ’t Duûvels bieëst te verjage. Tréktj mej inne stoet, gewaopendj met trommels en ratels, hawtj op potte, panne en kieëtels en blaosj op eur träöt, same of allein. Gein geluidsboxen en digitale muziek, gewoeën aojerwets zellef meziek en herrie make.

Weem zeen de “Kieëtellappers”?

De “Kieëtellappers” és de groep dae ’t initiatief neemtj um ’t Duûvels bieëst te verjage. Ze trékke d’rmej doeër de stad en zulle, óngerstuuëndj doeër ’t vôlk, laote zeen det ze neet bang zeen vör ’t Duûvels bieëst. Eder jaor zâl ‘ne ângere groep de ieër kriêge um de “Kieëtellappers” te vôrme en op eige creatief wiêze gestalte te gaeve. Dét kân ‘ne optochtgroep mer ouch ‘ne groep van ’n schoeël, hermeni-j of sportclub zeen. Jônk en aod saame oppe straot.

Dit jaor ésj de ieër aan V.V. de Batrave. ‘ne Groep vrînde hieët zich in 2018 beejeingepaktj um ’t vastelaovendjgeveûl doeër te gaeve aan de wichter. Nao ’n vörzichtig begîn in 2018, met as groep mejloupe inne optocht op Luuëke en uuteraard inne stad, zeen ze de jaore daonao vaste daelnemer en hebbe de léste 2 jaor ouch de Zûlvere Knoeëk gewonne. Dieëze groep kenmêrktj zich doeër völ energie, lôl en plezeer oppe straot te brînge. Det doon zoeëwaal de wichter as de aojers.