Logo

V.V. de Rogstaekers és ’t nowwe Vorstetiêdpêrk van start gegaon met ’n now logo. Vorst Stan hieët dit logo tiêdes ’t Cultureel Lint op 17 september 2017 geprizzentieërdj aan ’t groeëte publiek. Met ‘ne nowwe vorst aan ’t steur woor ’t tiêd um de vereîniging in ’n now jeske te staeke. Daorum és d’r gekoeëze vör ’n frisse, eigentiêdse en toch herkinbare uutstraoling.

De basis van ’t logo és ’t traditionele ‘Köpke’, waat al jaore lang symbool stieët vör de Wieërter Rogstaekersvastelaovendj. Daonaeve gaon de Rogstaekers trök nao de basis, namelik nao de kluuëre blaw en wit, van aodsher de hoêskluuëre van de vereîniging. ’t Köpke és vörzeen van een aantal now elemênte, zoals ‘ne schoeëne kraag, fieëstelikke confetti en ‘ne gouwe rog. Waat ouch now és, és de towveuging van ’t waopenschîldj vanne stad Wieërt, waat de Rogstaekers as stadsvastelaovendjvereîniging gruuëts uut wille drage.

’t Nowwe Logo és gemaaktj doeër Hans Moonen van aan15_vormgeving en Stef Mooren van Artvertisement.

V.V. de Rogstaekers és bli-j met ’t rizzeltaot en gruuëts op ’t nowwe gezicht van de vereîniging. D’r és gekoeëze vör ’n carnavaleske uitstraoling dî-j klaor és vör de towkomst, mer woeë de historie en de traditie van de Rogstaekersvastelaovendj in Wieërt in vuuërt bliêve laeve.

't Köpke és 'n beschêrmdj hândelsmêrk van V.V. de Rogstaekers - Wieërt

’t Köpke, ut logo vanne Rogstaekers, moog neet gebroêktj waere zoonger towstumming.
Neemtj contact op via sikretaris‑pr@vvderogstaekers.nl