Rogstaekers Jeugdpreens 2011, Justin 1e

16-01-2011

Jeugdpreens Justin I

Op Zôndig 16 jannewari hebbe De Rogstaekers uutgerope tot Jeugdpreens 2011 van Wieërt, Justin I. Weem és Justin I?

Ziene naam és Justin Thomassen en és 12 jaor gelieëje op 25 augustus geboeëre, groeëtgebrachtj és hae oppe Paltrokmolen op de Muuëlenakker.

Zien Pap és Peter Thomassen en és ‘ne zoeën van Peter vanne Kroêtpörs en Mia Kiggen, vreuger woeëndje di-j op Luuëke. Pap gieët bekans edere mêrge nao Panheel um vör Driessens rame te make. Zien Mam es Chantal Theunissen en és ‘n dochter van René van Pierre van Toon van Mieërus en Antoinette Maas. Mam és administratief mejwêrkster beej Bluestone Accountants en Belastingadviseurs. Verder hieët oeëze Jeugdpreens ein zösterke, Linsey en det és 9 jaor. Same kunne ze fein spuuële mer ouch flînk herrie make. ’t Leefste doon ze dét smêrgesvreug, dao kân mam dan wieër neet tieëge.

Hobbies hieët Jeugdpreens Justin ouch, hieël völ op de Playstation en mét zien vrînde boete spuuële. Voetballe és waal zien groeëtste hobbie, hae és dan ouch dréj kieër inne waek te vînge oppe voetbalvêldje van SV Laor, dao voetbaltj hae in de D3 mét völ vrînde.

Daonaeve és Justin nogal muzikaal, nów nog beej Rick mér wiltj hieël gaw mej gaon doon oppe trompet beej Hermeni-j St. Joseph 1880. Vör zien aardrijkskunde, geschiedenis en raekene gieët Jeugdpreens Justin 1e nao schoeël op de OBS Muuëlenakker en zitj beej juffraw Nelle en juffraw Linda in de klas.

Jeugdpreens Justin 1e hieët ’t vastelaovendj veere met de paplieëpel ingegoeëte gekrieëge. Zien pap en mam wore echte Flabbusse nome oeëze Jeugdpreens dan ouch al vreug mej nao alle vastelaovendj aktiviteite.

Wi-j al ieërder gezagdj hultj Jeugdpreens Justin 1e van voetballe en umdette nao ’t voetbalsezoen zien voetbalschoon en ouch al zien ânger schoon ram verslieëte zeen, hieët hae ingesteldj de Orde van ’t Aafgetraptj Scheunke”

Ein dînk wétj hae hieël zieëker en dét és dét hae d’r same met zien adjedânte ‘ne fantastiese vastelaovendj van gieët make ônger ziên devies:

“Fieëste ving ich kej sjiek, oppe noeëte vanne vastelaovendjmeziek”