Preensebâl

“Dao gaon vae weer, dao gaon vae weer, dânse, hosse, sprînge beej e lekker glaeske beer”

Op zaoterdig 10 fibberwarie nuuëdj de Stadspreens 2024 uch van hérte uut um te kaome veere det hae vör drej daag lânk de macht oeëver de Stad Wieërt hieët gekriêge.
Vanaaf 20:00 oor zal ’t fieëst oppe Mêrrentj en Noww Mêrrentj losbarste. ’t És gein Preensereceptie, dus gae hoôftj neet oore inne ri-j te staon en prebieëre te verstaon waat d’r gezagdj wurtj.
’t Wurtj ‘ne ongedwónge aovendj met völ meziek, schaele zeiver en vastelaovendjchaos, ’t wurtj ‘ne aovendj um de vastelaovendj te belaeve!

De Preens zal zich, same met zien gevôlg, in ’t fieëstgedruis storte woeëbeej dejjae ‘m uuteraard kuntj felicitieëre, d’r eine met ‘m drînke of oppe foto gaon. Mer boeëvenâl kujjae uch, same met eur kammeräöj, femiêlie of vereîniging óngerdómpele in ’n wêrm vastelaovendjbad.