As dejje wat organisieërtj, waat al jaore neet mieër hieët plaatsgevônge, és 't altiêd de vraog, of zoeëwat aanslutj. En kouptj dan mer 's genog (mer ouch wieër neet te völ) vlaaj in, aszje neet precies wètj, wi-jvöl minse d'r kaome, ouch umdet d'r nog 'ne daagkassa és. Zoondig 12 fibberwarie waas de Seniorematinee in de Poort van Limburg 't bewiês, det d'r nog genog animo és vör zoeë 'n evenemênt. D'r waerdje taofels en steûl beejgezatte en jao, d'r móst vlaaj waere beejgehaaldj. Behâlve de koffie mét vlaaj koeëme d'r later oppe middig ouch nog de noeëdige zoutjes, schiêfkes worst en blökskes kieës oppe taofel en kóste de aanwieëzige geneête van kâl en knouwel van Charlie Wijen en Frènske Adriaens. Mer de meziek van Stefan Wolter en van Mark & Willemien ging d'r in wi-j gesnieëje kook met mejzînge, sjoenkele, heej en dao wat minse oppe dânsvloer en de noeëdige polonaises. Naodet de Huppelpupkes nog haaje gedânsj, lieëp de middig op zien indj, mer de minse ginge pas met traone van 't lache wegk, wi-j de jongste aanwas van Preens Paul I en adjudânt Tom edereîn haaje laote huuëre, wi-j dejje d'r met Jacqueline achter de bar nog same eine gaotj drînke: Moerepetazie 2.0
Foto's van de Seniorematinee vingdje ónger de knop
"Kiek, det és Vastelaovendj!" zônge Phil en Nout beej de aafsloêting van de Seniorematinee op zoondig 12 fibberwarie 2023 in de Poort van Limburg. En geliêk hebbe ze, Want Vastelaovendj és vör joonk en aod en dan kujje d'r gerösj same eine gaon drînke, d'n eîne 'ne ranja en d'n ângere 'ne groeëte pot beer. As dejje mer lôl hetj. En met dieës klein groeëte manne kriegdje vanzelf Moerepetazie 2.0
