 |
 |
Op vriêdig 11 november 2016, tiêdes “Vorst Oppe Troeën” hieët os aller Vorst Jan, twieë hieëre beneûmdj tot ieërelid van Stadsvastelaovendjvereiniging de Rogstaekers.
Peter Coumans, woôr lid van 1973 wis 2012. In di-j 40 jaor hieët hae zoeëwat alles gedaon, waat d’r mer gedaon kân waere. Dao és gein kemissie di-j neet op de stuuën en tówverlaot van Peter hieët kunne raekene. Hae woor besteurslid inne funksie van Kommessaris en hae woor jaorelânk zieër strikt in zien funksie van Sirremoniemeister. Daag en nacht woor Peter drök met de Wieërter vastelaovendj en de Rogstaekers in ’t bezûndjer. As bliêk van groeëte waardieëring és Peter beneûmdj tot ieërelid.
Peter van Wegberg woor in 1988 Rogstaekerspreens en woor lid van 1989 wis 2008. Diverse kemissies hieët hae moôge deêne vuuër hae, as Kanseleer lid woôrt van ’t besteur. Wi-j in 2003 Vorst Ton aaftroeëj noôm Peter, tiêdelik as Kanseleer, ’t vuuërzitterschap oeëver. ‘ne Tiêd woeë in de Poort van Limburg tow ging en ’t Paviljoen oeëpe. Wis in 2005 Vorst Jan woôrt geïnstallieërdj weês Kanseleer Peter de vereiniging de wieëg. Ouch daonao bleêf hae înkel jaore, as Kanseleer, aane zi-j van Vorst Jan actief vör de vereiniging. Ouch vör Peter és ’n groeëte waardieëring óngerstreeptj met de beneûming tot ieërelid.
