Rogstaekers Jeugdpreens

Op dieës pagina kujje volge, waat de Jeugdpreens allemaol mejmaaktj vanaaf 't momênt van uutrope oppe ieërste Boonte Femiêlie Middig tot aan zien abdicatie op Vastelaovendjdieënsdig.

 
Beej zien uutroping oppe Boonte Femiêlie Middig gieët d'r ouch nao alle media inne buurt en inne provincie een pörsbericht uut. Heej volgtj de integrale versie:


 

Jeugdpreens Rens I

Op zoondig 26 jannewarie 2020 és aan ’t indj van de kwânte Boonte Femiêlie Middig, Rens Damhuis uutgeroôpe tot 69e Jeugdpreens van Wieërt.

De nowwe Hieërser oeëver de Wieërter wichtervastelaovendj 2020 és op ieërste Körstdaag 2007 geboeëre in ’t Wieërter Sint Jans Gasthoês as zoeën van Luuk Damhuis en Cindy Frencken.
In ’t dageliks laeve prebieëre juf Ilona en juf Lynn vanne Montessorischoeël Jeugdpreens Rens I wat slûmmer te make, en dét gieët heur aardig aaf.

Wi-j ‘ne échte Preens hieët Rens I twieë residênsies: De ieërste helluft vanne waek woeëntj hae beej pap inne Frankenstraot op Luuëke.
De twieëdje helluft vanne waek woeëntj de Jeugdpreens beej zien mam op Bosseve, oppe Anemoonhof.
Rens hieët ‘ne groeëte broor, Stan van 13 jaor aod, en ’n jónger zösterke, Isé van 10.
Beej pap op Luuëke maaktj de kat Sheriff ’t hoêshaoje complieët.

In ziene vreeje tiêd rentj oeëze Jeugdpreens ’n paar kieër per waek roônd oppe atletiekbaan van AV Wieërt woeë hoeëgsprînge z’n favoriete óngerdael és. Eine maeter twîntjig és z’n persuuënlik record.

Zjuust wi-j de mieëste van zien laeftiêdsgenoeëte spuuëltj ouch Rens gaer ’n spelleke op ein of ânger schêrm.

’n Jaor of viêf gelieëje vroôg Rens beej ’t aanklei-je aan zien mam: “Woeërum mót ich eigelik altiêd twieë dezellufdje zök aan doon?” Woeë op mam reagieërdje: “Rens, as dejjae det neet wiltj, dan hoôftj det neet.” “Top!”, dach Rens en vanaaf dae daag hieët Rens altiêd twieë verschillendje zök aan, gewoeën umdét ’t kân en umdet ederein zichzelluf moôg zeen.
Daorum hieët Jeugdpreens Rens I de Orde vanne verschillendje Zök ingestéldj.

Same met zien Adjudânte Mo Philipsen, Valerie Peeters en Dylan Bouten, de Jeugdraod van Elluf en de Huppelpupkes gieët Jeugdpreens Rens I de Wieërter wichtervastelaovendj vuuër ónger zien devies:

VANAAF VANDAAG TRÉK ICH MIEN ZÖK WAT HOEËGER OP,
DIEËZE VASTELAOVENDJ ZÉT ICH WIEËRT OP ZIÊNE KOP!


JP2020-01-QpDGGbs9skaT
 
Foto: Flitzer!


In dieëze video van Special Events Productions (s-e-p) kujje kieke nao de uutroping van Jeugdpreens Rens I tiêdus de Boonte Femiêlie Middig op zoondig 26 jannewarie.


2020-01-28Rens+Adjes
 
Vlnr.: Mo - Rens I - Valerie - Dylan

Op zoondig 16 fibberwarie 2020 woeërte oeës Preense geïnstallieërdj in 't stadhoês aane Wilhelminasingel. Vuuëraafgegânge doeër Huppelpupkes, Jeugdraod en de volledige Rogstaekersvereîniging koeëme de Hoeëghede van de groeëte trap aaf. Ze waerdje dao opgewachtj doeër veer wethaojers, di-j dao -verklédj as lede vanne Lambieck Knoup- klaor stónge um de stom streek van de Preense uut hun verlieëje 's duchtig aan te pakke. Wiêtendje, det ze effe later net zoeë haard trökgepaktj zoeëje waere. Hoeëgtepûnt waas neteurlik 't uutreike van de sluuëtels, woeëmej Tim I en Rens I tot aan de abdicatie de macht in 't stadhoês en daomej in Wieërt oeëverneme.

Daonao trok 't hieël gezelschap nao een sfeervol ingerichtdje Poort van Limburg vör de receptie, woeë hieël wat vereîniginge, gruuëpkes en Einzelgänger de Preense koeëme fillisitieëre met eur tiêdelikke macht. En det gebuuërdje neteurlik mét de noeëdige prezêntjes vör de Hoeëghede. Rens hieët vör 'n jaor of tieën (verschillendje) zök zat en Tim kân, mét al dae gekriêge drânk, nao gèster nog altiêd 'n kefee beginne, as hae van baan zou wille wissele. Doeër de inzet van völ vreejwilligers en ouch doeër de Aod Preense Club, di-j bekans voltallig as barpersonieël fungieërdje, lieëp alles op rölkes en kos ederein trökkieke op 'n zieër geslaagdje receptie.

Hoêsfotograaf Adrie Hendriks hieët de noeëdige opnames gemaaktj. Di-j kujje zeen in dieës twieë albums:

img-zijbalk-ichbin-s