Agenda Rogstaekers

Beej 'n onberaekenbaar sezoen huuërtj 'ne aangepaszje agenda. Dae wurtj heej wannieër van towpassing beejgewêrktj

  • Op vriêdig 18 fibberwarie wurtj de 70e Jeugdpreens van Wieërt uutgeroope. Det gebuuërtj in ‘t beejzeen van de Jeugdraod van Ellef, de Huppelpupkes en înkel genuuëdigdje. ‘t Groeëte publiek kân live getuûge zeen van dit fieëstelike spektakel via de website van Weert de Gekste en de Facebookpagina van VV de Rogstaekers. De uutzending startj op vriêdig 18 fibberwarie as. um 19:11 oor.
  • Op zoondig 20 fibberwarie és de officiële sluuëeteloeëverdracht aan Jeugdpreens Sjoerd I. Det gieët um 11:11 oor gebuuëre oppe trappe van 't aod-aod-stadhoês oppe Mêrrentj. As eînige Rogstaekerspreens van 2022 zâl Jeugdpreens Sjoerd I de sluuëtel van ’t Stadsachterpörtje ontvânge van börgemeister Vlecken en oeëver de Wieërter vastelaovendj regieëre. Nao ’t officiële gedaeldje zâl Ziêne Kleine Hoeëgheid 'ne defilé aafneme woeëbeej ederein de gelaegenheid kriêgtj um de Jeugdpreens te felicitieëre. Gae zeetj van herte uutgenuuëdigdj um heejbeej aanwieëzig te zeen. Mer haodtj oeës social media-kenale inne gaate, want 't zuuëtj d'r nao uut, det 't zoondig ouch nog slecht waer és en det d'r wurtj uutgewieëke nao 'n ânger locatie. Det kujje dan dao laeze! 
  • Op zaoterdig 26 fibberwarie zeen alle wichter van Wieërt van hérte welkom in Kefee de Brouwer oppe Oelemêrrentj.
    Tösse 14:00 en 17:00 oor és de dânsvloer vör de jeugd. En det allemaol ónger het devies van Jeugdpreens Sjoerd I: Hosse, sprînge, kaake, vae gaon d'r ein groeët fieëst van make!
  • Op maondjig 28 fibberwarie  tréktj d’r nao twieë jaor wieër ‘ne Wichteroptocht doeër de Wieërter binnestad. Vae roôpe alle Wieërter wichter op um nao de stad te kaome en mej te trékke in ‘ne boonte stoet. Vör dieëze kieër wêrke vae neet met inschriêvinge en zeen d’r gein priêze te winne. Dieëze kieër roôpe vae ederein op um vör de joeks mej te doon! Dieëze boonte stoet zâl ‘ne complieëte (on)georganisieërdje chaos waere, zjuust wi-j de vastelaovendj bedoeldj és. Uuteraard zâl d’r waal ’n vaste route zeen en deêne (veiligheids)aanwieëzinge van optochtbegeleiders opgevólgdj te waere. De kuitige tocht zâl starte um 13:30 oor aane Stationsstraot. Vae roôpe daelnemers op um zich heej uuterlik 13:00 oor te verzamele. Opstélle gebuuërdj op basis van aankomst. De optocht tréktj vervolges via:
    Stationsstraot, Langstraot, Van Berlostraot, Nowwe Mêrrentj, Meikoel, Mêrrentj, Hoeëgstraot, Oelemêrrentj, Emmasingel, Verstraetenwieëg, Schoeëlstraot, Koeëremêrrentj, Mêrrentj.
  • Op dieënsdig 1 mieërt zal Jeugdpreens Sjoerd I d'r toch echt aan mótte geluive. Naodet hieël wat hermeniekes en kepelle smiddigs ongetwiêfeldj vör de noeëdige meziek hebbe gezörgdj és 't um 19:11 oor zoeë wiêt: de abdicatie. Nao 11 daag és 't preensschap vör Sjoerd vörbeej. Hae zal ziene sluuëtel wieër in mótte leevere en de vaere waere hem aafgenoeëme. Oeëze aoje Rog van Wieërt gieët in vlamme op. D'r loupe wat traone oeëver de wange, 't és vörbeej, 't és gedaon: hae és wieër de 12-jaorige Sjoerd Roelofsen. Dieës aafsloêting wurtj gehaoje oppe trappe van 't aod stadhoês oppe Mêrrentj.

 

img-zijbalk-ichbin-s