V.V. de Rogstaekers gaon ’t nowwe Vorstetiêdpêrk van start met ’n now logo. Aankaomendj Vorst Stan hieët dit logo tiêdus ’t Cultureel Lint op 17 september 2017 geprizzentieërdj aan ’t groeëte publiek. Met 'ne nowwe vorst aan 't steur woor 't tiêd um de vereîniging in 'n now jeske te staeke. Daorum és d’r gekoeëze vör 'n frisse, eigentiêdse en toch herkinbare uutstraoling.
De basis van 't logo és 't traditionele ‘Köpke’, waat al jaorelânk symbool stieët vör de Wieërter Rogstaekersvastelaovendj. Daonaeve gaon de Rogstaekers trök nao de basis, namelik nao de kluuëre blaw en wit, van aodsher de hoêskluuëre van de vereîniging. 't Köpke és vörzeen van een aantal now elemênte, zooë-as 'ne schoeëne kraag, fieëstelikke confetti en 'ne gouwe rog. Waat auch now és, és de towveuging van 't waopenschîldj van de stad Wieërt, waat de Rogstaekers as stadsvastelaovendjvereîniging gruuëts uut willen drage.
't Nowwe logo és gemaaktj doeër Hans Moonen van Aan15_Vormgeving en Stef Mooren van Artvertisement. V.V. de Rogstaekers zeen bli-j met 't rizzeltaot en gruuëts op 't nowwe gezicht van de vereîniging. D’r és gekoeëze vör 'n carnavaleske uitstraoling di-j klaor és vör de towkomst, mer woeë de historie en de traditie van de Rogstaekersvastelaovendj in Wieërt in voeërt bliêve laeve.
’t Köpke, ut logo van de Rogstaekers, moog neet gebroêktj waere zoonger towstumming.
Neemtj contact op via sikretaris‑pr@vvderogstaekers.nl
