Rogstaekers Jeugdpreens

Jeugdpreens 2017: Preens Milan I van de Rogstaekers

Op zoondig 15 jannewari jl. és, aansloeëtendj aan de Boonte Femiêlie Middig met de titel “Woeë droûme uutkaome” in ’t Munttheater de droum van Milan Beerents uutgekaome: Hae és uutgeroôpe tot 66e Stads-Jeugdpreens van Wieërt. De 11-jaorige zoeën van Ralf Beerents en Inge Beerents-Litjens woeëntj same met zien pap en mam en zösterke Demi op de Beemdenstraot 4A op Luuëke. Dao ésj zellufs inne wîntjer lekker wêrm doeër de groeëte frietkieëtel dae ónger inne zaak van mam en pap stieët.

(Foto's: Loes Mennen Fotografie)

Juf Susan en Juf Inge uut groep 8 van IKC Leuken neme bêst völ vreeje tiêd van Milan in beslaag. Gelökkig hieët hae waal nog tiêd um boete te spuuële met z’n kammeräödjes en ‘ne bâl. As léste mân van de D2 van V.V. DESM wûrtj hae waal de ‘Boatênk vanne Moeësdiêk’ geneûmdj.
Vör z’n eige opkaome lieërtj Jeugdpreens Milan doeër ‘Krav Maga’ beej Loods 37 en hae és, same met z’n pap, regelmaotig te vînge beej wedstriêde van de bêste voetbalclub van Indhjevve.

Vastelaovendj veêre deût Milan al jaore, mieëstâl inne zaal vanne bure. Mer hae és ouch ‘ne fanatieke ‘koppe bawwer’ woeënao hae met zien eigegemaakdje kreasies altiêd mejdeût aan de optocht van V.V. de Zweeloeëre op Luuëke en neteûrlik de Wichteroptocht van V.V. de Rogstaekers.
Milan hieët ‘t good vör mekaar en gieët fluitendj doeër ‘t laeve. Hae hieët dan ouch de

‘orde van de Fluitendje Kuiter’  ingesteldj.

Same met z’n adjedânte Stef Beerents, Joey Zaalberg en Jur Knapen, Jeugdvorst Luca en de Jeugdraod van Elluf en de Huppelpupkes gieët Jeugdpreens Milan I de Wieërter jeugd vuuër ónger zien devies:

Met ‘ne fluitendje alaaf  wûrtj dieëze Vastelaovendj kejgaaf!

Proclamatie

van Jeugdpreens Milan I

vör de veêring van de Jeugdvastelaovendj 2017

Vae, Jeugdpreens Milan I, beej de grâsie van Vorst Jan en Jeugdvorst Luca en de Jeugdraod van Elluf en de Rogstaekersvereiniging, Moêlemaker van de Bieëmdjestraot op Luuëke, Frietjesvuuërpreûver van Cafetaria De Beemd, Geboeëre en getoeëge Zweeloeër, Braafste mènke van B.S. Luuëke, Knuffellieërling van Juf Susan en Juf Inge, Êrfgenaam van de Beerents-femiêlie, Klier van ‘s Pap, Mam en Demi, Gruuëtse fan van de Moeësdiêk en PSV, Onpassieërbare tênk van de D2 van de Moeësdiêk, en verdedingskûnstenaer van Krav Maga beej Loeëds 37.

Instéller van de ‘Orde van de Fluitendje Kuiter

doon uch te wiête det :

  1.  Vae fluitendj dieëze fantastische vastelaovendj vuuërgaon, same met Stadspreens Maurice I.
  2.  Vae dit neteûrlik ouch same doon met oeës állerbéste adjudânte , oeëze Jeugdvorst Luca en de hieële Jeugdraod van Elluf en de Huppelpupkes.
  3.  Vae d’r gruuëts op zeen um de léste Jeugdpreens te moôge zeen ónger Vorst Jan, mer ouch al ‘n fantastisch good geveûl hebbe beej Vorst Stan.
  4.  Vae neet kunne wachte tot vae de sluuëtel van ‘t Stadsachterpörtje uutt háng van Opper- Opper-Rogstaeker, Börgemeister Heijmans moôge ontvânge.
  5.  Vae uch nuuëje um aansloêtendj nao oeës recepsie te kaome um same te fieëste beej de Soos.
  6.  ‘t Absoluut de bedoeling és dejjae zoeëwaal in de keffees as boete op straot Wieërter vastelaovendjschlagers zîngtj.
  7.  Ederein, met di-j daag, op ‘n schoeën meneer met deîndânger umgieët zónger óngerscheid te make tösse geluîf, kultuur, beer-, wiên- of frisdrînker.
  8.  Vae hoeëpe dejje op de Wichterfieëstmiddig beej de Brouwer ammaol uut eûr daak gaotj.
  9.  Vae verwachte dejje beej de Wichteroptocht in groeëte getale nao álle kreaties kótj kiêke en nao mich trökzwejtj as vae os zeen.
  10.  Vae beej de abdikâsie same hieel völ moôge en gaon bäöke.
  11.  Vae uch wille advisieëre um eûr frietjes en frikkedellekes te alle tiêde beej Cafetaria de Beemd op Luuëke mótj gaon aete.

Dit alles ónger oeës devies :

Met ‘ne fluitendje alaaf  wûrtj dieëze Vastelaovendj kejgaaf!

Luuëke, Wieërt, jannewari 2017
Jeugdpreens Milan I

v.l.n.r. Joey Zaalberg, Jeugdpreens Milan Beerents, Stef Beerents en Jur Knapen