Organisatie

Rogstaekers en Rogstaekerinnekes,

’t Gieët wieër beginne, de gekke tiêd és aangebroeëke. Ich wîns uch de kaomendje waeke ‘ne te gekke tiêd mét völ lôl en plezeer. Laotj uch huuëre en bezeuktj oeës aktiviteite, aan kuuës és geîn gebrek. Bezeuktj oeës Boonte Aovendje, tieën aovendje achtereîn mét allein mer eige Wieërter artieste di-j uch van begîn tot ’t indj amezieëre en d’r ‘ne fantastiese aovendj van make. Nêrges in hieël Limburg en wiêt daoboete vingdje det waat dieës minse vuuër en achter de buun prestieëre, ‘ne dikke chapeau heejvör és waal op zien plaats.
Wildje ’s lekker uut eure bôl gaon, waat létj uch dan um e bezeuk te brînge aan de neet mieër wég te dînke Herrensitzung, ‘t Boorebâl, ’t Wiepkesbâl of Harrie & de Gebroeëke Zwieëgelkes. Allemaol gewêldjige aktiviteite di-j doeër of mét de Rogstaekers geörganizieërdj waere. ’n Hieël now aktiviteit dit jaor és de Dâns- & Amuzemêntsaovendj, ‘nen aovendj bedoeldj vör zoeëwaal joonk as aod, laotj uch mer verrasse.
Zieëker neet te vergaete és e bezeuk te brînge aan de installâsie en resepsie van oeës Preense, twieë fantastiese Wieërter joonges di-j de Wieërter vastelaovendj op ’n geweldjige meneer vuuër zulle gaon.
Lieërtj eur wichter dit stökske volkskultuur in stând te haoje en komtj mét ze nao de Boonte Femiêliemiddig, bezeuktj de Wichterfieëstmiddig en laotj ze genete van det waat dao geboeëje weurtj. Dootj mét ze mej aanne Wichteroptocht en bezeuktj de hosmiddig nao aafloûp.
‘t Hoeëgtepûnt keumtj naoteurlik mét de vastelaovendjdaag zelf. Vanaaf dieës plaats wil ich oeës optochtdaelnemers hieël völ suukses wînse. ‘nen Optocht woeë vae Wieërt weer mej oppe kaart zétte, neet allein L1 tillevisie gieët dae uutzende, ouch di-j groeëte joonges uut Hilversum vanne NOS zulle oeëze optocht oppe landelike tillevisie brînge. Laotj uch op maondjig allemaol zeen beej de Wichteroptocht. De apotheose keumtj op dieënsdig beej de Lindeboom Slaâg um de Mêrrentj. Paktj uch ’n toêt, trumke of waatter herrie maaktj mer dootj mét os mej.
Zétj eur zörg de kaomendje waeke aanne kânt, geneetj d’rvan, vae zulle d’r alles aan doon um dae schoeëne Wieërter vastelaovendj in stând te haoje. Gaer wil ich van dieës muuëgelikheid gebroêk make um miene dânk uut te spraeke aan âl di-j minse di-j os zoeëwaal financieel as materieel ongerstuuëne en neet te vergaete ‘ne bezûndjere dânk aan âl oeës vreejwilligers di-j ‘t hieël jaor doeër vör os klaor staon.
Allemaol ‘ne gooje vastelaovendj onger oeës devies:

Laeve de Rog, Viva oeës Wieërt
Vorst Jan