Harry en de Gebroeëke Zwiêgelkes en de Rogstaekers kieke trök op e fantastisch vastelaovendjsezoên.
 |
 |
Mét hâlfvaste in aantocht liêk ‘t aafgeloûpe vastelaovendjsezoên alweer wiêt achter
os te ligke, mer neet echt vör de bendlede van Harry en de Gebroeëke Zwiêgelkes en lede van stadsvastelaovendjvereiniging De Rogstaekers.
Zowaal ‘Harry’ als ‘de Rogstaekers’ wore ’t d’r oeëver eins det ‘t verzörgdje optreî-je
op vastelaovendjzaoterdig, de sfeer en entourage van begîn wis indj
‘vastelaovendjtop’ és gewaesj. Eets woeë vastelaovendjveerendj Wieërt gruuëts op moog zeen, teminste vör di-jgieëne di-j ‘t vanuut de binnekânt van ‘t paviljoen
hebbe mejgemaaktj.
De waeke vuuërafgaondj aan ’t optreî-je haaj ‘Harry’ doeër de nummers ‘Neîn mân’
en ‘Hallo’ volop regionaal en zelfs landelike publiciteit mét as klap oppe veurpiêl de finale op radio3 beej de verkeezing van ‘Carnavalshit 2011’. Det léste hieët d’r naoteurlik aan beejgedrage det vastelaovendjveerders, zelfs van wiêt uut d’n
umtrék, d’rbeej woeëje zeen beej det unieke optraeje. Jaomer genog goof det lang wachtri-jje aanne ingânk, gedow en daomej völ teluuërstélling beej vastelaovendjveerders di-j nao e paar oor inne ri-j te hebbe gestânge de melding krieëge det ‘t paviljoen tot de léste plaats uutverkochtj waas.
Vanaaf ‘t begîn, noow ongevieër 15 jaor gelieëje, és ‘t tradisie gewaesj det optreî-jes van Harry vör edereîn towgânkelik motte kunne zeen, dus soonger vuuërverkoûp
van entreekaarte.
Noow, achteraaf gezeen, moste zoeëwaal ‘Harry’ as ouch de Rogstaekers konkludieëre det dieëze opzét op 5 mieërt van dit jaor teluuërstéllinge hieët opgeleverdj en zelfs vör ’t geveul ‘n onveilige situasie in de massaal ri-j wachtendje minse. Dit was uteraard neet ‘t uutgangspûnt vanne organizâsie.
Dit moog en zal ‘t volgendj jaor neet mieër gebuuëre, waas dan ouch de konklusie van ‘t indjoeëverlég. Vör ‘t optreî-je van Harry en de Gebroeëke Zwiêgelkes op zaoterdag 18 fibberwari 2012 in ‘t Rogstaekerspaviljoen zulle vuuëraaf inne vuuërverkoûp de beschikbaar kaarte te kriêge zeen.
