Vreeje verkoûp Boonte Aovendj, Boonte Femiêlie Middig, Jeugd Gala Boonte Aovendj

09-12-2011

Donderdig 8 december es de de vreeje verkoûp van start gegange van de Boonte Aovendj, Boonte Femiêlie Middig en de Jeugd Gala Boonte Aovendj in  ’t Munttheater.

httpv://www.youtube.com/watch?v=8pmhTYJsHDs

 Boonte Aovendjartieste
 
 Femiêliefieëstartieste
 Harry & e GZ

De kaartjes kinne via de uutbalie van ’t Munttheater (oeëpeingstiede deënsdig wes vriêdig van 12.30 wes 17.00 oor en oppe  zaoterdig van 11.00 wes 16.00 oor), of tillefoon 0495-513575 of via www.munttheater.nl

Boonte Aovendj
De kaartjes vanne reguliêre Boonte Aovendje koste € 16,-
Vriêdig 20 en zaoterdig 21 jannewari zeen uutverkochtj.

Boonte Femiêlie Middig
De Boonte Wichtermiddig hieët un noow Jeske. “t weurtj ‘ne Boonte Femiêlie Middig vör wichterkes, papa’s, mama’s, opa’s en oma’s.
Dit jaor drei-je dieës middige ônger de titel:  “Kotj us kieeke beej os!”.
In tieëgestelling tot de vuuërgaondje jaore es ’t Programma neet ein verhaol mer opgebâwdj uut un aaneinschakeling van losse sketsjes, litjes en dans.  Naeve ’n keur van Wieërter Wichterartieste zeen d’r twieë dansgroepe van  Dansschoeël “The big Expierence”.
De wichterkes waere met genoeëme nao ’n straot in Wieërt um heej saame met de bewoeëners van alles te belaeve; Kortum  völ te zeen, te lache en te loestere.
Unne echte theatermiddig, woeë det zoeëwaal oppe buune as in de fwajee van alles gebuurdj. Alles  waat beej ‘ne proffesionieële vuuërstelling huuërdj aan leecht en geluid zal dieëze middig wes ‘ne schitterendj fieëst make. Dit alles oeëvergoeëte met ’n Vastelaovundsauske!
De middig startj um 14:00 oor en zal met de pauze d’r beej wes roontelum 16:00 oor doore. Nao de ieërste vuuërstelling op zoondig 15 jannuwari 2012 weurtj met vol tam tam de nowwe Rogstaekers Jeugdpreens 2012 uutgerope met aansloetendj ‘ne gezellige naozit. De twieëdje vuuërstelling es op zaoterdig 21 jannewari.
Towgangsbewieëze koste € 6,- (dus gein € 5) met ’n verassing vör oeës klein gaste

Jeugd Gala Boonte Aovendj
Vör ‘t ieërst és noow ‘ne Jeugd Gala Boonte Aovendj vör de jeugd vanne VO en MBO schoeële uut Wieërt en umgaeving. Mét meziek en ’nen hoûp humor wille vae uch, de jongere oonger os, kinnes laote make mét oeës bekindje Boonte Aovendje.
Ajje e CJP- of schoeëlpeske hetj en gae zeetj minstes 15 jaor dan kojje in aanmêrking vör e kaartje. ’t És de bedoeling det edereîn “op sjiek “ nao daen aovendj haer keumtj. De maegtjes in ’t lânk en de joonges in ’t zwert. Gae zultj dus létterlik alles uut de kast motte hale um zoeë schoeën muuëgelik vör d’n daâg te kaome.
Inne pauze és inne foyer de verkeezing van  ‘t  ‘schoeënste maegtje’ en de ‘schoeënste jong’ vanne klas. ’t Zjurieëre heejvan laote ve  aan de jeugd zelf oeëver. De maegtjes keeze ‘ne jong en de joonges keeze e maegtje. De zjurielede keeze vae, de Rogstaekers, beej binnekomst.
De winnaars zulle roond ‘n oor of 12 doeër Harry bekindj waere gemaakt en kriêge as waardieëring ‘ne theaterbon uutgereiktj.
Nao aafloûp vanne  Boonte Aovendj és d’r ’n “After Party”. Nemes minder as Harry & de Gebroeëke Zwieëgelkes zulle dan vör uch optreî-je.
Det moogdje neet misse!!
D’n entree és € 10,00. Um edereîn te laote tuine mét zien kreasie hebbe ve ’n vuuërontvangst inne foyer vanne Mûnt van 19.00 tot 20.00 oor. Zörgtj dejje vuuër 20.00 oor dao zeetj want dan begintj de Gala Aovendj en kân d’r nemes mieër binne.