Mét ‘t uutrope van de verschillendje Preense gieët ‘t vastelaovendjblood beej meinig vastelaovendjveerder haarder stroûme. Zoeë ouch beej de bendlede van Harry & de Gebroeëke Zwieëgelkes di-j al drök doondje zeen mét de vuuërbereî-jinge van eur vastelaovendjsezoên. Ouch dit jaor zal ‘Harry’ weer optraeje in ‘t Rogstaekerspaviljoen aanne Penitêntestraot in Wieërt op zaoterdig 18 fibberwari.
Vör allemaol di-j d’r vuuërig jaor beej wore waas det optraeje ‘n uniek vastelaovendjfieëst, Mer vör hieël völ di-j ore inne ri-j hebbe gestânge en d’r toen achter kwome det ze d’r neet mieër in koste waas ‘t ‘n groeëte teluuërstélling!
Al drek nao vastelaovendj lete Harry & de Gebroeëke Zwieëgelkes en de Rogstaekers in e gezamelik pörsbericht wieëte: “Dit moog en zal ‘t volgendj jaor neet mieër gebuuëre.” Dit jaor zal ‘t dan ouch ângers gaon en és d’r ein centraal vuuërverkoûpplaats.
Op vriêdig 3 fibberwari zal in ‘t Rogstaekerspaviljoen aanne Penitêntestraot vanaaf 19.00 uur de vuuërverkoûp zeen. Mét e maximum van 4 kaarte per persoeën (€ 5,- per stök) zulle de beschikbaar kaarte dan verkochtj gaon waere!
Mochte d’r nao dieëzen aovendj nog kaarte oeëver zeen dan zulle di-j te koûp aangeboeëje waere oppe verschillendje verkoûppûnte van V.V. de Rogstaekers.
Moch ‘t Harry & zien Zwieëgelkes dit jaor weer lökke um vör ‘nen uutverkochdje zaal te beginne dan és d’r toch nog ’n klein muuëgelikheid um e gedaeldje van ‘t optraeje mej te make!
Vanaaf 21.00 uur zal namelik onger ’t motto: ‘eîne d’ruut, eîne d’rin’, nog de kâns waere geboeëje um ‘t fieëstspektakel, uteraard nao aankoûp van ‘n entreebewiês, mej te make.
