Ed Stroek en Frans Snels: Ieëre artieste vanne Boonte Aovendj

17-01-2013

Frans Snels en Ed Stroek zeen zaoterdigaovendj 12 jannewarie  nao de léste Boonte Aovendj in ’t Munttheater beej eur afscheid uutgerope tot  ieëre-artieste vanne Rogstaekers.

Frans en Ed of Ed en Frans (want weem neumdje noow ’t ieërst?), ’t és twieë hang op eîne boêk en twieë men, woeëbeej de vastelaovendj doeër de aore stroumtj en di-j altiêd de drang hebbe um minse te ammesieëre mét eure humor en lidjes.

Echte ras-artieste mer ouch schriêvers van völ sketches en lidjes. Mét eur optreî-jes hebbe ze 15 jaor lânk de zaal oppe kop gekrieëge. Sketches vôl humor en loompigheid en altiêd op zeuk nao ‘t rendje van waat d’r acceptabel és.

Mét de lidjes blieftj ‘t neet allein bepêrktj tot de buun van ‘t Munttheater, mer tot wiêt inne umtrék weurtj beej al eur optreî-jes de sfeer bepaoldj. Kortum artieste di-j eure stêmpel op de Boonte Aovendje hebbe gedoedj en dieës ongerscheî-jing dan ouch dik verdene. Ze wore groeëte vuuërvechters um de Boonte Aovendj te beginne en aaf te sloête mét e lidje en dao hebbe ze de Rogstaekers van wieëte te oeëvertuge. Wi-j kujje dan baeter eur carrière as Boonte Aovendjartiest aafsloête as mét det te doon woeë dejje mej begonne zeetj.

Nao dieës serie van tieën Boonte Aovendje hebbe ze same mét alle artieste en begelédj doeër de Boonte Aovendj Bend en ‘t koeër Manoevre aafscheid genoeëme van ‘t Wieërter publiek mét ‘t lidje ‘De Mêrrentj’. Op dieëze léste woeërte ze emotionieël verrasj wi-j de dochters van Ed en Frans de microfoon oeëvernoeëme en ‘n eige versie van ‘De Mêrrentj’ lete huuëre as groeët ieërbetoeën aan eur vaders. Daonao vele vör Ed en Frans de gerdiêne vör de léste kieër tow.

Mieër foto's in de fotoalbum