Nowwe opzet Wieërter Vastelaovendj Lidjesfestival

21-10-2013

Gae zootj ‘t, zoeë tösse de Oktoeëberfieëste en ‘t 8 x 11 jaorig jubileum van V.V. de Rogstaekers doeër, bekans vergaete mer aankaomendje zaoterdig 26 oktoeëber wermtj V.V. de Rogstaekers ’t vastelaovendjpebliek al op vör eur 8 x 11 jaorig jubileumsezoên. Dan stieët namelik ‘t “Wieërter Vastelaovendj Lidjesfestival” op ’t program.

De vakzjurie hieët tiedes de vuuërronde ‘n 8-tal nummers uutgekoeëze di-j, vanaaf 20.00 oor, live te huuëre zeen oppe bühn vanne Poort van Limburg. Oonger eur bekindje zoeë wi-j Ronald & Carien,  Ed & Frans en Mark & Wilhelmien, mer ouch nowkaomer Tim Crins. De live begeleiding van dieës nummers és in hang van “Holle Klot”  (de muzikânte van de bênd No Tuxedo) en de Horny Hornets.

Harry & Joerik

 

La Bamba, LVK winnaars 2013

Robbie Snoek van Moerepetazie

‘ne Vakzjurie mét dao in oonger ângere ‘t duo La Bamba (winnaars LVK), Rewalt Tobben, Jos van Dooren (Harry & Joerik) en Jan Coenen (Mooshoofpaadzêngers), ‘ne vastelaovendjzjurie mét vastelaovendjveerders uut diverse vereiniginge en ‘n selectie uut ‘t aanwieëzige pebliek, zal same de kuuës make uut de 8 vastelaovendjlidjes. De winnaar moog zich dé Vastelaovendjschlager van Wieërt neume. De béste 4 nummers kaome op ‘n cd te staon di-j beej  vuuërinschriêving te koup és.

Dieës cd mét bepêrkdje oplaag kosj € 4,95 en kujje noow al rizzervieëre via wvl@vvderogstaekers.nl en és vanaaf 30 november op te hale beej Party-Time, Maasport.

Beej Party Time kujje de CD ouch rizzervieëre en betale zodejje zieëker zeetj vanne CD!

Naeve de 8 finaliste zeen ouch, Holle Klot, Harry & Joerik, Frank Tuasuun & Joss Mennen, Moerepetaâzie en de winnaars van ‘t LVK 2013, La Bamba te huuëre.

De echte vastelaovendjveerder moog dieëze vuuërstart van ‘t vastelaovendjsezoên neteurlik neet misse. Kaarte zeen vör € 5,– te koup beej Primera-Wouters, Kieëntj-Moêsel, fieëstwînkel Party-Time, Maasport, Kaas en Ko en van Bun, Muntpassage, cafetaria De Beemd en kefee Jonas, Luuëke, AK Multimedia, Beest, cafetaria Plaza, Bosseve en aanne kassa van ’t Munttheater vör € 6,50.