 |
 |
 |
 |
 |
 |
V.V. de Rogstaekers veere 8×11 jaorig jubileum op vriêdig 22 en zaoterdig 23 november
’t Vastelaovendjsezoên 2013-2014 stieët vör V.V. de Rogstaekers in ‘t taeken van ‘t 8×11 jaorig bestaon. Op vriêdig 22 en zaoterdig 23 november weurtj ter gelegenheid van dit jubileum, oonger d’n titel “Efkes wat ângers”, e knallendj vastelaovendj-meziekprogramma geprizzentieërdj inne foonkelnowwe zaal vanne Poort van Limburg.
Oonger leiding van Tjeu Snoek és ‘ne big-band, geformieërdj uut allemaol Wieërter muzikânte, al e paar maondj bieëzig mét ‘t rippetieëre van ‘n 45-tal vastelaovendjnummers van bekindje Wieërter en Limburgse artieste, mer ouch speciaal vör dieës gelegenheid geschrieëve dialecttekste. Naodet dieës club al mieërdere zoondigemêrges aanne instrumentaal invölling hieët gewêrktj, zeen ‘t de Wieërter artieste, zoeë as Mark & Wilhelmien, Luned Hermus, Joss Mennen, Ronald en Carien en Dennis Hendrikx, di-j dao tiêdes de aafgeloupe en kaomendje rippetities de zânk aan towveuge. Bedînktj daobeej ’t achtergroondkoeër, oonger leiding van Mark Fonteijn, en de Limburgse artieste di-j same mét de hieël bubs op 20 en 21 november oppe ginneraal rippetities de pûntjes oppe i gaon zétte en ‘t zal uch dudelik zeen det ‘t programma muzikaal “stieët as ‘n hoês”.
Limburgse toppers op allebej de daag prezênt
‘t Programma vör vriêdig 22 en zaoterdig 23 november és 1 op 1 ‘tzelfdje. Det wiltj zégke det de Limburgse toppers De Toddezèk, Kartoesj, La Bamba, Thei & Marij, Erwin, W-dreej en Beppie Kraft op allebej de daag vanne perti-j zulle zeen. “Efkes wat ângers” és ‘t det ze eur eige repertoire laote huuëre, mer ouch eîn nummer van ‘nen ângere Limburgse artiest of ‘ne Wieërter vastelaovendjschlager zînge.
Wieërter artieste hebbe ouch ’n groeëte rol
Naeve de Limburgse toppers zeen de Rogstaekers neteurlik “gruuëts” op alles waat Wieërt aan vastelaovendjartieste te beeje hieët. Ze zeen in ‘t Limburgse dan meschien wat minder bekindj, mer kwalitatief kunne ze zich maete mét âl dat Limburgs gewêldj. Mark & Wilhelmien, Joss Mennen, Harry Zellef, Ed & Frans, Erik Fikken, Ronald en Carien, Marcel en Louis (van Plat Wieërts), Dennis Hendrikx, Gerlinde Smolenaers, Ruud Theunissen, Tim Crins en Jean Stassen, ‘t zeen ettelike name vanne bubs aan Wieërter artieste di-j dieës aovendje vörbeej kaome. Ze brînge Wieërter vastelaovendjschlagers, mer ouch dialect big-band meziek. ‘ne Hap uut ‘t repertoire: “I’m just a gigolo”, “Ik kan het niet alleen”, “Johnny B good”, “Oh so quiet” uteraard vörzeen van dialecttekste. Ouch ‘t nummer “Barcelona” van Joss Mennen en Marjos Metsemakers stieët weer op ‘t programma.
Zaoterdigaovendj 23 november uutverkochtj – Vör vriêdig 22 november nog kaarte beschikbaar
Vör de vastelaovendjveerders en meziekleefhebbers di-j niks van dit spektakel wille (moge) misse zeen d’r nog kaarte vör vriêdig 22 november en di-j zeen vör de priês van € 12,50 te koup beej: Van Bun, Boek- en Tijdschriftenhandel en Kaas en Ko inne Muntpassage, cafetaria Plaza Boshoven, -Primera-Wouters winkelcentrum Moesel, cafetaria De Beemd Leuken, Feestwinkel Party Time Maaspoort, en AK Multimedia Biest.
